អ្នកកីឡាកាសអាជីពលោក Paul Michael Levesque ឬត្រូវបានគេស្គាល់ថាជា Triple H ថ្មីៗនេះ បានបង្ហាញការផ្តល់យោបល់ចំពោះកីឡាករនៅ Premier League មួយរូប ដែលកំពុងស្ថិតក្រោមក្រសែភ្នែកចង់បានពីសំណាក់ក្លឹបតោខៀវ Chelsea។
នោះគឺយុវជន Declan Rice ដោយកន្លងទៅល្ហៀងៗថា ក្រុមរបស់លោក Framk Lampard ចង់ចរចាយកខ្សែបម្រើសញ្ជាតិអង់គ្លេសរូបនេះ នៅតម្លៃខ្លួនប្រមាណ ៨០ លានផោន។
បញ្ជាក់ថា Rice ធ្លាប់ជាយុវជនហ្វឹកហាត់នៅថ្នាលរបស់ Chelsea បានសម្រេចការផ្ទេរមក West Ham ពេលគេមានអាយុ ១៦ ឆ្នាំ ហើយបានវិវត្តខ្លួនជាបន្តបន្ទាប់ មានឱកាសមកលេងនៅឈុតធំនៅឆ្នាំ ២០១៧។ សព្វថ្ងៃគេជាកីឡាករដ៏សកម្មមួយរូបរបស់ West Ham ហើយក៏ជាចំណែកជួយឲ្យក្រុមឆ្លងផុតតំបន់ត្រូវកាត់ឈ្មោះចេញពីក្របខ័ណ្ឌ Premier League រដូវកាលចាស់ផងដែរ។
ប្រាប់ទៅកាន់ BT Sport អ្នកកីឡាកាស Triple H ដែលជាអ្នកគាំទ្រក្លឹប West Ham បានបង្ហាញការយល់ឃើញថា៖ “ខ្ញុំចង់ផ្ញើសារនេះទៅកាន់ Declan Rice ដោយខ្ញុំដឹងថាអ្នកកំពុងទទួលបានការសម្រេចចិត្តដ៏ធំមួយនាពេលខាងមុខ ប៉ុន្តែខ្ញុំចង់ឲ្យអ្នកយល់ថា នៅក្នុងជីវិតរបស់យើង វាមានរឿងជាច្រើនទៀតដែលកាន់តែសំខាន់”។
លោកសង្កត់ធ្ងន់៖ “អ្នកមានឱកាសក្លាយជាអ្វីម្យ៉ាងនៅ West Ham គឺការក្លាយជាវីរបុរស និងជាវីរបុរសដែលមានអ្នកគាំទ្រជាច្រើនគាំទ្រអ្នក ហើយអ្នកគួរតែនៅទីនេះដើម្បីបង្កើតភាពជោគជ័យ ហើយក្លាយជាអ្នកឈ្នះ ពោលគឺនៅជាមួយ West Ham ជាក្លឹបដែលបានបណ្តុះបណ្តាលអ្នកឲ្យឈានមកដល់ចំណុចនេះ”៕
ប្រភព៖ TalkSport