លោក Alberto Fernandez ប្រធានាធិបតីអាហ្សង់ទីន បានហៅ Lionel Messi មកលេងនៅស្រុកកំណើតវិញ ជាមួយក្រុម Newell’s Old Boys ។
បន្ទាប់ពីមានដំណឹងថា Messi ប្រាប់ថ្នាក់ដឹកនាំថាចង់ចាកចេញពីក្រុម FC Barcelona មក មានក្លឹបជាច្រើនចង់បានរូបគេ។ ដោយឡែកនៅអាហ្សង់ទីនវិញ ក្លឹបដើមរបស់ Messi ឈ្មោះថា Old Boys ក៏មានបំណងចង់យកយុវជនរបស់ខ្លួនត្រលប់ទៅវិញផងដែរ។ អ្នកគាំទ្រក្លឹបនេះជាច្រើនបានប្រមូលផ្ដុំគ្នាលើកទង់ ដើម្បីបញ្ជាក់ថាពួកគេចង់ឃើញប្រធានក្រុម Barcelona រូបនេះ ត្រលប់មកលេងនៅស្រុកកំណើតរបស់ខ្លួនវិញ។
ជាមួយគ្នានោះដែរ លោក Alberto Fernandez ប្រធានាធិបតីអាហ្សង់ទីនក៏បានបញ្ជាក់ថាលោកបានទាក់ទង Messi រួចហើយផងដែរ ដើម្បីហៅមកលេងនៅក្លឹបដើមវិញ បើសិនជារូបគេពិតជាចង់ចាកចេញពី Barcelona មែន។ លោក Fernandez បានបន្ថែមទៀតថា៖ “អ្នកគឺជាបេះដូងរបស់យើង ហើយយើងមិនដែលបានឃើញអ្នកលេងនៅក្នុងប្រទេសរបស់យើងឡើយ។ យើងពិតជាមានមោទកភាពណាស់ ប្រសិនបើអ្នកមកបញ្ចប់អាជីពបាល់ទាត់នៅក្លឹប Newell’s Old Boys”៕ប្រភព Goal
