Lionel Messi ជាកីឡាករដ៏សំខាន់មួយ ប្រចាំក្លឹបបាល់ទាត់ Barcelona ហើយរយៈពេលជាច្រើនឆ្នាំមកនេះ បុរសសញ្ជាតិអាហ្សង់ទីនរមែងទទួលបានការគោរពស្រលាញ់និងឲ្យតម្លៃខ្ពស់បំផុត ពីសំណាក់ប្រជាជន និងអ្នកគាំទ្រនៅក្នុងទីក្រុងដ៏ធំរបស់អេស្ប៉ាញមួយនោះ។
តើអ្នកធ្លាប់ដឹងទេថា ផ្ទះរបស់ Messi មិនត្រូវបានអនុញ្ញាតឲ្យយន្តហោះអាចហោះកាត់បាន? ហើយនៅពីក្រោយនេះ តើមានមូលហេតុពិសេសអ្វីទៅ ពោលជាឥទ្ធិពលរបស់ M10 ឬក៏បែបណា?
កន្លងមកប្រធានក្រុមហ៊ុនអាកាសចរណ៍ Vueling លោក Javier Sanchez-Prieto ក៏ធ្លាប់និយាយបែបនេះថា៖ “អ្នកមិនអាចហោះកាត់កន្លែងដែល Messi រស់នៅបានទេ នេះវាជារឿងដែលមិនធ្លាប់កើតមានទាល់តែសោះក្នុងលោក”។
ភូមិគ្រឹះដ៏ធំស្កឹមស្កៃរបស់ Messi ស្ថិតក្នុងតំបន់ Gava ដែលមានចម្ងាយ ១៩ គីឡូម៉ែត្រពីកីឡដ្ឋាន Camp Nou និងប្រមាណ ១០ គីឡូម៉ែត្រពីអាកាសយានដ្ឋានដ៏ធំបំផុតប្រចាំទីក្រុង Barcelona។ នៅតំបន់ដែល Messi កំពុងស្នាក់អាស្រ័យនេះ ផ្អែកតាមច្បាប់របស់ប្រទេសអេស្ប៉ាញគឺជាតំបន់ឬ Zone ដែលមានការរឹតត្បិតផ្នែកបរិស្ថាន បែបនេះមិនត្រូវបានអនុញ្ញាតឲ្យយន្តហោះណាមួយហោះឆ្លងកាត់តំបន់នេះបានឡើយ អ៊ីចឹងមិនមែនថាតែផ្ទះរបស់ Messi ដែលមានតម្លៃជាង ៧ លានដុល្លារនោះទេ សូម្បីតែស្ថាប័នឬទីតាំងឯទៀតស្ថិតក្នុងតំបន់នោះ ក៏មិនអាចមានយន្តហោះហោះឆ្លងកាត់ដូចគ្នា ហើយតម្រូវឲ្យយន្តហោះដែលចេញពីអាកាសយានដ្ឋានហោះឆ្លងកាត់តាមតំបន់មាត់សមុទ្រជំនួសវិញ។
សរុបមក ចម្លើយគឺមិនមែនដោយសារតែផ្ទះរបស់ Messi នោះទេ ផ្ទុយទៅវិញគឺដោយសារលោករស់នៅនៅក្នុងតំបន់ដែលមានការរឹតត្បិតការពារដល់ផ្នែកបរិស្ថាន ប៉ុន្តែតាមអ្នកជំនាញភាគច្រើនជឿថា តំបន់ដ៏ស្ងៀមស្ងាត់និងគ្មានការរំខានមួយនោះ ក៏មិនមែនសុទ្ធតែអ្នករាល់គ្នាឬប្រជាជនសាមញ្ញអាចទៅរស់នៅបាននោះដែរ ពោលលើកលែងតែបុគ្គលសំខាន់ឬអ្នកមានទ្រព្យស្តុកស្តម្ភណាមួយតែប៉ុណ្ណោះ៕
ប្រភព៖ SportBible