ការប្រកួតពានរង្វាន់សម្ដេចហ៊ុន សែនវគ្គ៨ក្រុមចុងក្រោយជើងទីមួយនៅល្ងាចនេះបានដឹងលទ្ធផលហើយណាហ្គាបានត្រឹមស្មើព្រះខ័នរាជស្វាយរៀង២ទល់២ នៅស្ដាតចាស់ ខណៈដែលភ្នំពេញក្រោនឈ្នះគិរីវង់២ទល់១។
ការប្រកួតនៅស្ដាតចាស់ ក្រុមរបស់លោកមាស ចាន់ណាបានត្រឹមស្មើជាមួយក្រុមព្រះខ័នរាជស្វាយរៀងរបស់លោក Conor Nestor តែប៉ុនណោះ។ ២គ្រាប់របស់ស្វាយរៀងរកបានដោយកីឡាករ ណុប តុលា និង ហូយ ផល្លីន។ ចំណែក២គ្រាប់របស់ណាហ្គារកបានដោយកីឡាករ គួច សុគុម្ភៈ និង គួច ដានី។
ចំណែកការប្រកួតនៅកីឡដ្ឋាន ស្មាតអ អេស អិន វិញគឺ២គ្រាប់របស់ម្ចាស់ផ្ទះភ្នំពេញក្រោនរកបានដោយកីឡាករ អ៊ន ចាន់ប៉ូលីន (PK)និងម៉ៅ ពិសិដ្ឋ។ មួយគ្រាប់របស់គិរីវង់រកបានដោយកីឡាករជើងចាស់ ជូ ហាវស៊ុតហ្វ្រីឃីកនៅវគ្គទី១។ ជើ់ងទី២នឹងលេងនៅសប្ដាហ៍ក្រោយដោយ ណាហ្គានឹងធ្វើដំណើរទៅទឹកដីខេត្តស្វាយរៀងវិញម្ដង ខណៈភ្នំពេញក្រោននឹងធ្វើដំណើរទៅទឹកដីខេត្តតាកែវរបស់គីរីវង់៕