អ្នកគាំទ្រស្មោះស្ម័គ្ររបស់ក្រុម FC Barcelona បាននាំគ្នាទៅតវ៉ានៅមុខកីឡដ្ឋាន Camp Nou ដើម្បីឱ្យប្រធានក្លឹប Bartomeu ចាកចេញពីតំណែង បន្ទាប់ពី Messi ស្នើសុំចាកចេញ។
នៅយប់មិញនេះ មានដំណឹងថា Messi បានស្នើថ្នាក់ដឹកនាំក្លឹបដើម្បីចាកចេញរកក្លឹបថ្មីលេងហើយ បើទោះជារូបគេនៅសល់កុងត្រា១ឆ្នាំទៀតជាមួយ Barcelona ក៏ដោយ។ ការចង់ចាកចេញនេះ ត្រូវបានគេដឹងថាដោយសារខ្សែប្រយុទ្ធរូបនេះមិនពេញចិត្តជាមួយថ្នាក់ដឹកនាំក្រុម ជាពិសេសថ្នាក់លើតែម្ដង ដែលបណ្ដោយឱ្យកីឡាករល្អៗចេញ ហើយនាំយកមកវិញកីឡាករដែលមិនអាចជួយក្រុមបានច្រើននៅប៉ុន្មានរដូវកាលមកនេះ។
ការចង់ចាកចេញរបស់ Messi នេះដែរ ក៏ស្រាប់តែធ្វើឱ្យអ្នកគាំទ្រច្រើននាក់មិនសប្បាយចិត្តជាមួយលោក Bartomeu ដែលជាប្រធានក្លឹបនោះទេ។ ពួកគេបានប្រមូលផ្ដុំគ្នាភ្លាមៗតែម្ដង ដើម្បីតវ៉ា និងចង់ឱ្យប្រធានក្លឹបរូបនេះចុះចេញពីតំណែងមុនអាណត្តិ ខណៈដែលការបោះឆ្នោតជ្រើសរើសប្រធានថ្មី ធ្វើឡើងនៅឆ្នាំក្រោយឯណោះ៕ប្រភព Marca