រឿងរ៉ាវអំពីការចាកចេញរបស់ Lionel Messi កំពុងកាន់តែក្តៅគគុកឡើង ក្រោយពីមានដំណឹងច្បាស់ការថាកីឡាករអាហ្សង់ទីន បានប្រាប់ទៅក្លឹបថាខ្លួនចង់ចែកផ្លូវកាលពីយប់មិញនេះ។
ពាក់ព័ន្ធនឹងរឿងខាងលើ អ្នកគាំទ្រគួរតែដឹងច្បាស់អំពីរឿងរ៉ាវសំខាន់ ២ ដែលទាក់ទិននឹងតម្លៃបញ្ចប់កុងត្រារបស់ Messi ក៏ដូចជាតម្លៃពលកម្មដែល Messi កំពុងទទួលបាននៅ Barcelona។
ដូចបានចែងក្នុងកិច្ចកុងត្រាដែល Messi បានចុះហត្ថលេខាតាំងពីដំបូង គឺតម្លៃផ្តាច់កុងត្រារបស់ខ្លួនថ្លៃប្រមាណ ៧០០ លានអឺរ៉ូ ដែលនេះជាទំហំចំណាយមួយមិនងាយមានក្លឹបណាហ៊ានចាយដល់ប៉ុណ្ណឹងនោះទេ ដោយកន្លងទៅសម្រាប់តម្លៃខ្លួនថ្លៃបំផុតរបស់កីឡាករគឺ Neymar Jr ក្លឹបបារាំង PSG ចាយអស់ ២២២ លានអឺរ៉ូតែប៉ុណ្ណោះនៅឆ្នាំ ២០១៧។
ប៉ុន្តែ Messi មានសិទ្ធពិសេសគឺអាចចាកចេញរៀងរាល់បញ្ចប់រដូវកាលនីមួយៗ ដោយលក្ខខណ្ឌឥតតម្លៃខ្លួន ត្បិតបើក្នុងកុងត្រាសល់ពេល ១ ឆ្នាំទៀតក៏ដោយ (ដល់ខែមិថុនា ឆ្នាំ ២០២១) បែបនេះមានន័យថាក្លឹបដែលចង់បានលោក គឺមិនចាំបាច់ចាយលុយលើតម្លៃខ្លួនឡើយ។ យ៉ាងណាមិញការប្រើប្រាស់សិទ្ធពិសេសនេះ មិនប្រាកដថាអាចធ្វើទៅបាននៅរដូវក្តៅនេះទេ ព្រោះតាមលក្ខខណ្ឌបានចែង គឺលុះត្រាណាតែ Messi ផ្តល់ដំណឹងជូន Barcelona មុនខែមិថុនា តែវាជាបញ្ហាមួយដែលគេងឿងឆ្ងល់ដូចគ្នា ព្រោះឆ្នាំនេះជំងឺរាតត្បាតកូវីដ១៩ បានអូសបន្លាយរដូវកាលឲ្យបញ្ចប់នាខែសីហាឯណោះ។
ដោយឡែកសម្រាប់តម្លៃពលកម្មរបស់ Messi បច្ចុប្បន្ននេះ លោកជាប់ឈ្មោះជាកីឡាករស៊ីថ្លៃបំផុតក្នុងលោក ដោយមួយខែទទួលបានប្រាក់ ៨,៣ លានអឺរ៉ូ និងមួយឆ្នាំបាន ៩៩,៦ លានអឺរ៉ូ ដែលជាថ្លៃពលកម្មមិនងាយមានក្លឹបណាហ៊ានផ្តល់ជូនស្រួលៗបានឡើយ៕ ប្រភព៖ AF