ក្រុមទាំង១៣នៃក្របខ័ណ្ឌលីគកំពូលកម្ពុជា រដូវកាល២០២០នេះ បានបញ្ចប់ការប្រកួតជើងទី១ ហើយ៦ក្រុមលើកំពូលតារាងនឹងបន្តការប្រកួតប្រជែងម្ចាស់ដំណែងជើងឯកដោយចាប់ឆ្នោតប្រកួតវិលជុំ។
ក្រុមខ្លាំងៗទាំង៦រួមមាន៖ បឹងកេត, ព្រះខ័នរាជស្វាយរៀង, វិសាខា, កងយោធពលខេមរភូមិន្ទ, ភ្នំពេញក្រោន, និងណាហ្គាវើល ហើយក្រុមទាំង៦នេះ នឹងត្រូវចាប់ឆ្នោតជ្រើសរើសគូប្រកួតជុំទី២ នាថ្ងៃទី២៥ ខែសីហា ឆ្នាំ២០២០ ខណៈក្រុមលេខ៧ដល់លេខ១៣ ត្រូវប្រកួតធម្មតា។
ដោយឡែក! ក្រុមទាំង៦នេះបឹងកេតបានឡើងទៅឈរកំពូលតារាងក្រោយយកឈ្នះព្រះខ័នរាជស្វាយរៀង៤ទល់២កាលពីម្សិលមិញនៅកីឡដ្ឋានស្វាយរៀង។៤គ្រាប់របស់ក្រុមភ្ញៀវ បឹងកេតធ្វើសម្រេចបាន២គ្រាប់ដោយកីឡាករ ម៉ាត់ នូរុណ, Gopane Mothusi, និង សៀង ចន្ធា ខណៈ២គ្រាប់របស់ម្ចាស់ផ្ទះ ព្រះខ័នរាជស្វាយរៀង រកបានដោយកីឡាករ Kobayashi Daisuke និងកីឡាករ Jean Marie Privat Befolo Mbarga។
ឆ្លងកាត់១២ប្រកួតរបស់បឹងកេតឈ្នះ១០ប្រកួត ស្មើ២ប្រកួត មិនដែលចាញ់ មាន៣២ពិន្ទុ ឈរលេខ១ ។ រីឯ១២ប្រកួតរបស់ព្រះខ័នរាជស្វាយរៀង ឈ្នះ១០ប្រកួត ស្មើ១ប្រកួត និងចាញ់១ប្រកួត មាន៣១ពិន្ទុ ឈរលេខ២៕