លោក Thomas Tuchel អ្នកចាត់ការក្រុម PSG យល់ឃើញថាក្រុម Bayern Munich មានប្រៀបជាងក្រុមខ្លួន ព្រោះមានបទពិសោធឈ្នះពានរង្វាន់ធំនេះច្រើនដងមកហើយ។ការប្រកួតពានរង្វាន់ UEFA Champions League វគ្គផ្ដាច់ព្រ័ត្ររវាងក្រុម PSG និង Bayern Munich បានឈានចូលមកដល់ហើយនៅម៉ោង២រំលងអាធ្រាត្រយប់នេះ។ វាជាការប្រកួតដែលជក់ចិត្តមួយសម្រាប់អ្នកទស្សនាត្បិតអី PSG ឆ្នាំនេះធ្វើបានល្អ ហើយ Bayern Munich វិញ រឹតតែខ្លាំងមួយកម្រិតទៀត នៅប៉ុន្មានប្រកួតចុងក្រោយនេះ។
ជាក់ស្ដែងលោក Tuchel បាននិយាយចំពោះក្រុម Bayern ថា៖ “Bayern មានប្រៀបជាងនៅពេលលេងប្រកួតធំបែបនេះ។ ពួកគេជាក្រុមធំមួយ ពួកគេមានកីឡាករដែលមានកម្រិតសមត្ថភាពខ្ពស់ ប៉ុន្តែវាតែងតែមានកន្លែងនិងដំណោះស្រាយសម្រាប់ជួបពួកគេ។ យើងត្រូវតែរកវិធីដើម្បីយកឈ្នះពួកគេ”៕