ជាមួយការចាប់ផ្តើមអាជីពនៅឈុតធំ ចាប់តាំងពីឆ្នាំ ២០០៤ រៀងមក Lionel Messi បានឆ្លងកាត់ក្រោមការដឹកនាំរបស់អ្នកចាត់ការល្បីឈ្មោះជាច្រើន ហើយសរុបនៅរយៈពេល ១៦ ឆ្នាំមកនេះ មានអ្នកចាត់ការ ៧ រូបហើយធ្លាប់បានផ្លាស់ចេញនៅទឹកដី Camp Nou។
ដំបូងបង្អស់គឺស្ថិតក្រោមសម័យកាលដឹកនាំរបស់ លោក Frank Rijkaard ដែលគ្រូហូឡង់រូបនេះហើយជាអ្នកនាំ Messi ចេញពីថ្នាលយុវជន មកចូលរួមនៅឈុតធំ។ ចន្លោះឆ្នាំ ២០០៤ ដល់ ២០០៨ នៃពេលវេលាដឹកនាំរបស់លោក Rijkaard សម្រាប់កីឡាករអាហ្សង់ទីនលេងបាន ១១០ ប្រកួត រកបាន ៤២ គ្រាប់ និង Assist ១៧ លើក ហើយបានឈ្នះពាន LaLiga ២ លើក។
លុះទល់សម័យកាលលោក Pep Guardiola មកដឹកនាំចន្លោះឆ្នាំ ២០១៨-១២ Messi ក៏កាន់តែធ្វើបានល្អខ្លាំងឡើង ដោយ ២១៩ ប្រកួត រកបាន ២១១ គ្រាប់និង Assist ៩៣ លើក ហើយឈ្នះពានដល់ទៅ ១៤ ឯណោះ រួមបញ្ចូលទាំង UCL ២ លើក។
ក្រោយពេលដែល Pep ចាកចេញ លោក Tito Vilanova បានដឹកនាំចន្លោះឆ្នាំ ២០១២-១៣ ហើយនៅ ៥០ ប្រកួតរបស់ Messi គេរកបាន ៦០ គ្រាប់និង Assist ១៦ លើក ហើយឈ្នះជើងឯកនៅពាន LaLiga។
រដូវកាលក្រោយទៀត ផ្លាស់មកដឹកនាំដោយលោក Gerardo Martino គ្រាដែលមាន Neymar មកដល់ M10 ក៏រកបាន ៤១ គ្រាប់នៅ ៤៦ ប្រកួត តែឈ្នះបានត្រឹមពាន Supercopa de Espana មួយគត់។ រហូតដល់សម័យកាល Luis Enrique មកដឹកនាំ ៣ ឆ្នាំទល់ឆ្នាំ ២០១៧ ជាពេលដែលតំបន់ប្រយុទ្ធរបស់ Barca មាន Messi, Neymar និង Suarez ឬហៅកាត់ MSN កំពុងតែល្បីរន្ទឺខ្លាំងឡើង ហើយក៏ធ្លាប់បានឈ្នះពាន UCL ជាមួយគ្នាផងដែរ។ M10 គ្រានោះលេង ១៥៨ ប្រកួត រកបាន ១៥៣ គ្រាប់និង Assist ៧០ លើក។
អ្នកចាត់ការទី ៦ គឺលោក Ernesto Valverde ក៏នៅតែរាប់ថាធ្វើបានល្អ ត្បិតបើមិនបានឈ្នះពាន UCL ក៏ដោយ តែ M10 រកបាន ១១៣ គ្រាប់និង Assist ៥០ លើកនៅ ១២៨ ប្រកួត ហើយឈ្នះពានចំនួន ៦។
មកទល់ពេលចុងក្រោយនេះ ជាយុគសម័យដឹកនាំរបស់លោក Quique Setienដែលនាំបរាជ័យធំបំផុតដល់ Messi ពោលជាលើកទី ១ ក្នុងអាជីព ដែល M10 ស្ថិតក្រោមការដឹកនាំរបស់គ្រូដែលមិនអាចត្រួសត្រាយផ្លូវឲ្យក្លឹបឈ្នះពានសូម្បីមួយក្នុងរដូវកាលទោល ហើយកីឡាករអាហ្សង់ទីនរកបានតែ ១៤ គ្រាប់ប៉ុណ្ណោះ ក្រោមការដឹកនាំរបស់ Setien ចាប់តាំងពីពាក់កណ្តាលខែមករារៀងមក៕
ប្រភព៖ Marca