ក្រោយចប់ការប្រកួតរវាង Manchester City និង Lyon ដែលមានផ្សាយផ្ទាល់លើទំព័រ CTS Sports នៅប៉ុន្មានម៉ោងមុននេះ យើងក៏សម្រេចរកបាន ៤ ក្រុមដែលមានឈ្មោះ បន្តទៅវគ្គពាក់កណ្ដាលផ្ដាច់ព្រ័ត្រ UEFA Champions League។
នោះគឺក្លឹបអាល្លឺម៉ង់ RB Leipzig ត្រូវជួបគ្នាជាមួយក្លឹបបារាំង Paris Saint-Germain ស្របពេលដែល Bayern Munich ត្រូវតតាំងក្រុម Lyon ហើយការប្រកួតទាំងពីរនេះធ្វើឡើងនៅថ្ងៃទី ១៨/១៩ សីហា ក្នុងទឹកដីប្រទេសព័រទុយហ្គាល់ដដែល ហើយមានផ្សាយផ្ទាល់លើទំព័រ CTS Sports។
បញ្ជាក់ថាក្នុងចំណោមក្រុមទាំង ៤ ដូចបញ្ជាក់ខាងលើ គឺមានតែ Bayern Munich មួយគត់ ដែលធ្លាប់មានប្រវត្តិឈ្នះពានអឺរ៉ុបមួយនេះ ហើយឈ្នះបានដល់ទៅ ៥ លើកឯណោះ ដោយលើកចុងក្រោយនារដូវកាល ២០១២-១៣ ខណៈក្រុម ៣ ផ្សេងទៀតមិនទាន់ស្គាល់រសជាតិសូម្បីតែម្តង។
ដោយឡែកបើបង្វែរទៅមើលកីឡាករផ្ទាល់ គឺនៅសេសសល់ Robert Lewandowski ដែលមានកំណត់ត្រាសំខាន់ៗកំពុងរង់ចាំ ក្នុងនោះមានដូចជាការតាមបំបែកកំណត់ត្រា រកគ្រាប់បាល់ច្រើនបំផុតនៅមួយរដូវកាល UCL ដែល CR7 ធ្វើបានកាលពីរដូវកាល ២០១៣/១៤ មាន ១៧ គ្រាប់ ខណៈ Lewandowski កំពុងមាន ១៤ គ្រាប់ និងកំណត់ត្រាមួយផ្សេងទៀតប្រសិនចំណោម ២ ប្រកួតសេសសល់ Bayern Munich អាចបន្តឡើង ហើយកីឡាករប៉ូឡូញរកបាន ៥ គ្រាប់ នោះគេនឹងរំកិលឈ្មោះជា Top Scorer លំដាប់ទី ៣ នៅប្រវត្តិសាស្ត្រ UCL ថែមទៀតផងដែរ៕