RB Leipzig បានយកឈ្នះនៅលទ្ធផល ២-១ ទៅលើក្លឹប Atletico Madrid ឆក់បានឱកាសឆ្ពោះទៅវគ្គ ៤ ក្រុមចុងក្រោយ UEFA Champions League។ វាជាប្រវត្តិសាស្រ្តលើកដំបូងរបស់ក្លឹបអាល្លឺម៉ង់ ហើយក៏ជឿថាមានអ្នកគាំទ្រជាច្រើនប្រាកដជាចង់ដឹងរឿងស៊ីជម្រៅអំពីក្លឹបទើបបង្កើតថ្មីមួយនេះ មុនដល់ការប្រកួតវគ្គបន្ទាប់ទល់ PSG នាពាក់កណ្តាលសប្តាហ៍ក្រោយ។
CTS Sports លើកមកបង្ហាញនូវ ៤ ចំណុចធំៗ ដែលអ្នកគួរដឹងពីប្រវត្តិនិងភាពជោគជ័យរបស់ក្លឹប RB Leipzig៖
១) ប្រវត្តិនិងការផ្លាស់ប្តូរឈ្មោះ
មិនខុសពី RB Salzburg និង New York Red Bulls ដោយក្រុម RB Leipzig ក៏ស្ថិតក្រោមការគ្រប់គ្រងនៃក្រុមហ៊ុនតែមួយ នោះគឺ Red Bull GmbH។ ប៉ុន្តែក្លឹបនេះជាក្លឹបបង្កើតក្រោយ ដោយបានលេចចេញជារូបរាងនៅថ្ងៃទី ១៩ ឧសភា ឆ្នាំ ២០០៩ គិតមកទល់ពេលនេះមានអាយុកាលទើបតែ ១១ ឆ្នាំប៉ុណ្ណោះ។
ដំបូងឡើយវាមានឈ្មោះថា Red Bull Leipzig ប៉ុន្តែសមាគមបាល់ទាត់អាល្លឺម៉ង់ហៅកាត់ DFB បានប្រកាសឲ្យផ្លាស់ប្តូរឈ្មោះនោះចេញ ក្រោមហេតុផលគិតថា ក្លឹបបានប្រើប្រាស់ឈ្មោះ Red Bull ដើម្បីចង់ទាញប្រយោជន៍ការធ្វើទីផ្សារខ្លាំងពេក ទើបប្តូរមកជាពាក្យខ្លី RB វិញ ហើយក៏មិនសំដៅទៅពាក្យពេញ Red Bull តែជាពាក្យថា <<RasenBallsport>> និងសូម្បីតែ Logo របស់ក្លឹបក៏បានផ្លាស់ប្តូរពីទម្រង់ចាស់មកទម្រង់ថ្មី ពោលមិនអនុញ្ញាតឲ្យសំដៅដល់អត្តសញ្ញាណនៃ Logo របស់ផលិតផលណាមួយឡើយ។
២) ការវិវត្តខ្លួនពីលីគលំដាប់ទី ៥ មកលីគលំដាប់ទី ១ Bundesliga
នៅរដូវកាល ២០០៩/១០ RB Leipzig បានចាប់ផ្តើមការប្រកួតអាជីពដំបូងរបស់ពួកគេ នៅលីគលំដាប់ទី ៥ ហើយឈ្នះ ២៦ ប្រកួត ស្មើ ២ ចាញ់ ២ ឈរចំណាត់ថ្នាក់ទី ១ និងមានឱកាស Promote មកលេងនៅលីគលំដាប់ទី ៤ នាឆ្នាំបន្ទាប់។
រំលងប៉ុន្មានឆ្នាំ ចូលដល់រដូវកាល ២០៣/១៤ ក្លឹប RB Leipzig ក៏មានឱកាសវិវត្តទៅកម្រិតមួយផ្សេងទៀតនៅលីគលំដាប់ទី ៣ ហើយប្រើពេលត្រឹមមួយរដូវកាលឡើងបានដល់លីគលំដាប់ទី ២ និងនៅរដូវកាល ២០១៦/១៧ កាលពី ៤ ឆ្នាំមុននេះ ពួកគេបាន Promote ឡើងដល់លីគលំដាប់ទី ១ Bundesliga ហើយរដូវកាលដំបូងឈរចំណាត់ថ្នាក់ទី ២ ក្នុងលីគថែមទៀត។
៤ រដូវកាលជាប់គ្នានៅ Bundesliga ក្លឹប Leipzig បានចំណាត់ថ្នាក់មិនដែលហួស Top 6 ឡើយ ហើយនៅរដូវកាល ២០១៩/២០ នេះ ការចូលរួមប្រកួតនៅពានអឺរ៉ុប UEFA Champions League ក៏ក្លឹបបង្កើតកំណត់ត្រាជោគជ័យថែមទៀត ដោយតាំងពីរដូវកាល ២០១០/១១ ដែល Schalke 04ឡើងបានចុងក្រោយបង្អស់ គឺមិនទាន់មានក្លឹបអាល្លឺម៉ង់ណាផ្សេងទៀតក្រៅពី Bayern និង Dortmund អាចរំកិលខ្លួនមកដល់វគ្គពាក់កណ្ដាលផ្ដាច់ព្រ័ត្រ UCL បានឡើយ។
៣) កំណត់ត្រាតម្លៃផ្ទេរចូល និងតម្លៃរួមនៃក្រុមទាំងមូល
Leipzig មិនសូវចំណាយច្រើនលើកីឡាករនោះទេ ដោយកំណត់ត្រាផ្ទេរចូលថ្លៃបំផុត គឺក្លឹបចាយអស់ត្រឹម ១៩ លានអឺរ៉ូ នោះគឺការនាំយកខ្សែបម្រើ Dani Olmo និង Almadou Haidara នៅរយៈពេល ២ ឆ្នាំចុងក្រោយ។
ក្រឡេកទៅតម្លៃរួមនៃប្រព័ន្ធកីឡាករក្នុងក្រុមទាំងមូល ក៏ Leipzig មានតម្លៃត្រឹម ៥០៧ លានអឺរ៉ូ នេះបើធៀបនឹងក្រុមដែលទើបបរាជ័យ Barcelona ថ្លៃដល់ ៩៨៣ លានអឺរ៉ូ ហើយ Atletico Madrid មានតម្លៃ ៧៨៤ លានអឺរ៉ូ និងគូប្រជែងត្រៀមប៉ះគ្នា PSG មានតម្លៃ ៨០១ លានអឺរ៉ូ។
៤) មានគ្រូដឹកនាំវ័យក្មេងបង្អស់
នៅលីគកំពូលទាំង ៥ សួរថានរណាជាអ្នកចាត់ការវ័យក្មេងបង្អស់ ចម្លើយគឺគ្រូរបស់ Leipzig នេះហើយ លោក Julian Nagelsmann ដោយបច្ចុប្បន្នលោកមានវ័យ ៣៣ ឆ្នាំ ហើយក៏ជាគ្រូដំបូងក្នុងលោកដែលអាចដឹកនាំក្លឹបឡើងមកកាន់វគ្គ ៤ ក្រុមចុងក្រោយ UCL ផងដែរ៕
ប្រភព៖ Wikipedia | TransferMarkt