ក្រុម Leipzig បានធ្វើឱ្យមានការភ្ញាក់ផ្អើលជាខ្លាំង ក្រោយពីពួកគេអាចយកឈ្នះលើក្រុម Atletico Madrid បានក្នុងលទ្ធផល ២-១ នៅយប់មិញនេះ ក្នុងការប្រកួត UEFA Champions League វគ្គ៨ក្រុមចុងក្រោយ។
មុនការប្រកួត អ្នកគាំទ្រនិងវិភាគជាច្រើនមើលឃើញថាក្រុមទើបបង្កើតឆ្នាំ២០០៩របស់អាល្លឺម៉ង់នេះ ទំនងជាមិនអាចទប់ទល់ជាមួយក្រុមបទពិសោធជោកជាំ AT Madrid បានឡើយ។ តែជាក់ស្ដែង ក្នុងការប្រកួតនៅយប់មិញនេះ RB Leipzig ពិតជាធ្វើបានល្អ និងលេងដោយទំនុកចិត្តរហូតទទួលបានជ័យជន្នះដើម្បីឡើងទៅវគ្គពាក់កណ្ដាលផ្ដាច់ព្រ័ត្រតែម្ដង។
ក្រោយពីចប់ការប្រកួតនោះទៅ លោក Julian Nagelsmann បាននិយាយថា៖ “វាជាការប្រកួតល្អបំផុតសម្រាប់ក្រុមខ្ញុំ ហើយខ្ញុំពិតជារីករាយខ្លាំងណាស់។ ការប្រកួតនេះយើងមិនបានបង្កើតឱកាសច្រើនទេ ហើយ AT Madrid ក៏មិនមានដូចគ្នា។ តែចុងក្រោយយើងអាចបង្កគ្រោះថ្នាក់ដល់ពួកគេបាន ហើយរហូតដល់ទទួលបានជ័យជម្នះតែម្ដង។ ខ្ញុំគិតថាយើងនឹងមាន Beer បន្តិចបន្ដួចដើម្បីអបអរនៅសណ្ឋាគាររបស់យើង ហើយបន្ទាប់មកយើងនឹងផ្ដោតការប្រកួតទល់ក្រុម PSG ទៀត”៕ប្រភព Dailymail
