ក្រុមយក្សអេស្ប៉ាញ Real Madrid បានប្រកាសជាផ្លូវការហើយថា ពួកគេនឹងមិនចំណាយប្រាក់ច្រើនដើម្បីទិញដូរកីឡាករទេ នៅរដូវកាលដោះដូរកីឡាករនេះ ដោយសារតែបញ្ហា Covid-19 ។
លោក Jose Angel Sanchez ថ្នាក់ដឹកនាំជាន់ខ្ពស់ម្នាក់របស់ក្រុម Real Madrid បានជួបជាមួយកីឡាករទាំងអស់មុនរំសាយក្រុមដើម្បីសម្រាកលំហែកាយ។ ក្នុងឱកាសនោះដែរ លោកបានបញ្ជាក់ថាថ្នាក់ដឹកនាំពេញចិត្តសមាជិកទាំងអស់ក្នុងក្រុម បើទោះជាលេងនៅកម្រិតអឺរ៉ុបមិនជោគជ័យក៏ដោយ។ ស្របពេលបច្ចុប្បន្នក្លឹបកំពុងជួបបញ្ហាហិរញ្ញវត្ថុផងនោះ នៅរដូវកាលថ្មីខាងមុខនេះនឹងមិនមានទិញដូរកីឡាករថ្មីនោះទេ។
បើទោះជាមិនទិញកីឡាករថ្មីចូលមែន ប៉ុន្តែក្រុម Real Madrid នឹងកោះហៅកីឡាករដែលដាក់ឱ្យគេខ្ចីជើងល្អៗនោះត្រលប់មកវិញ។ ជាក់ស្ដែង Martin Odegaard ត្រូវបានក្រុមលោក Zidane យកពីក្រុម Real Sociedad មកវិញហើយ។ តាមគម្រោងកីឡាករ២នាក់ទៀតគឺ Dani Ceballos និង Andriy Lunin ក៏ត្រូវកោះហៅត្រលប់មកវិញផងដែរ៕ប្រភព Marca
