លោក Nasser Al-Khelaifi បានបញ្ជាក់ថាខ្សែប្រយុទ្ធ Neymar និង Kylian Mbappe នឹងមិនចាកចេញពីក្រុម PSG ឡើយ ដោយពួកគេលេងរហូតចូលនិវត្តន៍នៅទីនេះតែម្ដង។
ខ្សែប្រយុទ្ធទាំងពីរខាងលើនេះ ជាអ្នកបង្កើតឱកាសនិងជួយក្រុម PSG យកឈ្នះលើក្រុម Atalanta បាន ២-១ ដើម្បីឡើងវគ្គពាក់កណ្ដាលផ្ដាច់ព្រ័ត្រពានរង្វាន់ UEFA Champions League កាលពីយប់មិញនេះ។ ក្រោយពីបង្ហាញទម្រង់លេងល្អ និងជួយក្រុមបានឈ្នះនេះហើយ ទើបបានជាប្រធានក្លឹប PSG បញ្ជាក់ថាមិនឱ្យអ្នកទាំងពីរចាកចេញទៅណាទេ។
លោក Nasser Al-Khelaifi បាននិយាយក្រោយចប់ការប្រកួតនៅយប់មិញថា៖ “Ney ជាមួយ Kylian គឺស្ថិតក្នុងចំណោមកីឡាករល្អបំផុតនៅលើលោកនេះ។ គាត់នៅ Top3 នៅលើលោក។ Neymar ជាប់ឈ្មោះជាកីឡាករល្អប្រចាំការប្រកួត គាត់ពិតជាអស្ចារ្យខ្លាំងណាស់។ គាត់និង Kylian នឹងមិនចាកចេញទៅណានោះទេ។ ពួកគេនឹងនៅ PSG រហូតទៅ”៕ប្រភព Marca
