បន្ទាប់ពីរងបរាជ័យនៅ UEFA Champions League ក្រោមថ្វីជើងរបស់ Lyon មិនទាន់ ២៤ ម៉ោងស្រួលបួលផងនោះ ក្លឹប Juventus ក៏ប្រកាសពីការបណ្ដេញចោលអ្នកចាត់ការលោក Maurizio Sarri ហើយជំនួសភ្លាមៗនៅអតីតជើងចាស់លោក Andrea Pirlo។
ការដកតំណែងឆៅៗបែបនេះ មិនមានន័យថា Juventus អាចឲ្យអ្នកចាត់ការសញ្ជាតិអ៊ីតាលីចាកចេញទៅ ទាំងដៃទទេនោះទេ ពោលគឺនៅតែមានប្រាក់សំណងផ្អែកតាមកុងត្រាដែលបានចុះហត្ថលេខាជាមួយគ្នាកាលពីពេលមុន។
Sarri បានចាកចេញពី Chelsea មកដឹកនាំនៅ Juventus នាថ្ងៃទី ១ កក្កដា ឆ្នាំ ២០១៩ ដោយព្រមព្រៀងលើកុងត្រារយៈពេល ៣ ឆ្នាំ ហើយតម្លៃពលកម្ម ១ រដូវកាល លោកទទួលបានប្រមាណ ៥ លានផោន ដោយមិនទាន់រាប់ប្រាក់លើកទឹកចិត្តផ្សេងៗ។ ដូច្នេះក្លឹបក៏ត្រូវគោរពលើកុងត្រាដែលសេសសល់ រុញឲ្យមានការទូទាត់ប្រាក់សំណងសម្រាប់ Sarri ជាចាំបាច់ ដោយអាចមានចន្លោះពី ១៨ ទៅ ២៧ លានផោន ស៊ីសងលើ Sarri ទៅស្រវាយកការងារថ្មីនៅពេលណា កំឡុងរយៈពេល ២ ឆ្នាំបន្ទាប់នេះ។
បញ្ជាក់ថា Sarri បានដឹកនាំ ៥១ ប្រកួតនារយៈពេលជាងមួយឆ្នាំជាមួយ Juventus ទទួលបានជ័យជម្នះ ៣៤ លើក ស្មើ ៨ លើក ចាញ់ ៩ លើក។ ជោគជ័យត្រឹមពាន Serie A ដែលប្រកៀកប្រកិតពិន្ទុជាមួយ Inter Milan មួយគត់ ក្រៅពីនោះដូចជា Supercoppa Italiana និង Coppa Italia សុទ្ធសឹងតែរបូតចេញពីដៃទាំងស្រុង៕