ក្រុម FC Barcelona បានឡើងទៅវគ្គ៨ក្រុមចុងក្រោយហើយ ក្រោយពីយកឈ្នះលើក្រុម Napoli នៅយប់មិញនេះក្នុងលទ្ធផល ៣-១ នៅជើងទី២ សរុបទាំងពីរជើង ៤-២។
ឡើងទៅវគ្គ៨ក្រុមចុងក្រោយនេះដែរ ក្រុមអ្នកមានបុណ្យនឹងត្រូវតតាំងជាមួយក្រុម Bayern Munich ដែលឡើងមកវគ្គ៨ក្រុមនេះដោយបំបាក់ក្រុម Chelsea ក្នុងលទ្ធផល ៧-១។ លោក Setien បាននិយាយចំពោះការប៉ះក្រុមយក្សអាល្លឺម៉ង់ថានឹងក្លាយជាការប្រកួតពិបាកមួយសម្រាប់ក្រុមលោកជាក់ជាមិនខាននៅវគ្គ៨ក្រុមនេះ។
អ្នកចាត់ការដែលដាក់គោលដៅយកពាន UEFA Champions League បាននិយាយថា៖ “ដៃគូទាំងអស់សុទ្ធតែពិបាកនិងខ្លាំង។ វានឹងធ្វើឱ្យយើងពិបាក ហើយពួកគេក៏នឹងពិបាកដូចគ្នាព្រោះវគ្គនេះសុទ្ធតែក្រុមខ្លាំង”។ រំលឹកថាការប្រកួតនៅវគ្គ៨ក្រុមចុងក្រោយនេះ នឹងធ្វើឡើងនៅព័រទុយហ្គាល់ ដោយលេងតែមួយជើងប៉ុណ្ណោះចាប់ពីថ្ងៃទី១៣ខែសីហាឆ្នាំ២០២០នេះទៅ៕ប្រភព MARCA