Lionel Messi ត្រូវបានគេដឹងថា កីឡាករលំដាប់កំពូលមួយរូបក្នុងប្រវត្តិសាស្រ្តបាល់ទាត់ ហើយក្រៅពីការប្រៀបធៀបជាមួយ CR7 ដែលជាគូប្រជែងបច្ចុប្បន្ន ជាញឹកញយក៏ធ្លាប់មានមតិខ្លះ ធ្វើការប្រៀបធៀបទៅនឹងអតីតវីរបុរសរួមសញ្ជាតិអាហ្សង់ទីនគឺ Diego Maradona ផ្ទាល់ផងដែរ។
ប្រធានបទនេះក៏ត្រូវបានគេជីកកកាយ សាកយកមកសួរនាំកូនប្រុសរបស់ Maradona ហើយចម្លើយរបស់គេ គឺពិតជាដូចអ្វីដែលអ្នករាល់គ្នារំពឹងទុក។
ប្រាប់នៅបទសម្ភាសន៍ជាមួយព័ត៌មាន SPORT កូនប្រុសបង្កើតរបស់ Maradona លោក Diego Signara បាននិយាយថា៖ “Messi គេពិតជាអស្ចារ្យខ្លាំងណាស់ ប៉ុន្តែបើធៀបជាមួយនឹងឪពុករបស់ខ្ញុំ គឺមិនអាចទៅរួចនោះទេ”។
លោកបន្ថែមទៀតថា៖ “អ្នកមិនអាចយកមនុស្សទៅធៀបនឹងមនុស្សក្រៅភពបានឡើយ ដោយយើងអាចនិយាយថា Maradona ជាស្តេចបាល់ទាត់ ហើយ Messi ជាកីឡាករល្អបំផុតនៅចំណោមមនុស្សក្នុងលោក ខ្ញុំពិតជាសុំទោស តែវាជាការពិតគឺគ្មាននរណាអាចឈានដល់កម្រិតឪពុកចំណាស់របស់ខ្ញុំបានឡើយ វាពិតជាមិនអាចទៅរួចមែន”។
គួរបញ្ជាក់ថា Diego Signara ជាកូនប្រុសច្បងរបស់ Maradona មានអាយុ ៣៣ ឆ្នាំ ហើយសព្វថ្ងៃកំពុងបម្រើអាជីពនៅក្លឹប CD Guarnizo នៃក្របខ័ណ្ឌលំដាប់ទី ៤ របស់បាល់ទាត់នៃប្រទេសអេស្ប៉ាញ៕
ប្រភព៖ SportBible