ក្រុម Lazio របស់អ៊ីតាលី បានស្នើយក David Silva មករួមក្រុមរដូវកាលក្រោយ បន្ទាប់ពីកីឡាករអេស្ប៉ាញរូបនេះអស់កុងត្រានៅ Manchester City ។
ក្រុម Lazio រំពឹងខ្ពស់ថាពួកគេអាចបញ្ចុះបញ្ចូល Silva មករួមក្រុមបាននៅរដូវកាលក្រោយ ជាមួយកុងត្រារយៈពេល២ឆ្នាំ។ ក្រោយពីកុងត្រានេះហើយ ក្លឹបមួយនេះក៏នឹងផ្ដល់ឱ្យកីឡាករវ័យ៣៤ឆ្នាំជាមួយប្រាក់ឈ្នួល៥២ ០០០ផោនក្នុង១សប្ដាហ៍ ផ្ទះប្រណិត និងសេវាកម្មជាច្រើនទៀតផងដែរ។ យ៉ាងណាមិញ Silva ទំនងជាចង់បានប្រាក់ឈ្នួលខ្ពស់ជាងនេះបន្តិច ទៅព្រមទៅលេងនៅអ៊ីតាលី។
អតីតកីឡាករជម្រើសជាតិអេស្ប៉ាញខាងលើនេះ បានចាកចេញពីក្រុម Man City ក្រោយរួមរស់ជាមួយគ្នា១០ឆ្នាំមក។ កាលនៅជាមួយក្រុមមេឃខៀវ រូបគេរកបាន២២០ ០០០ផោនក្នុង១សប្ដាហ៍។ ក្រោយពីចាកចេញទៅ មិនត្រឹមតែ Lazio ទេដែលចង់បាន ក្រុមនៅលីគអាមេរិក ជាច្រើនទៀតក៏ទាក់ទងរូបគេដែរ៕ប្រភព Dailymail
