ខ្សែបម្រើ Casemiro បានចាត់ទុកការលេងបិទទ្វានៅដីរបស់ Manchester City គឺជាគុណប្រយោជន៍ដល់ក្រុម Real Madrid សម្រាប់ជើងទី២ពានរង្វាន់ UEFA Champions League វគ្គ១៦ក្រុមចុងក្រោយ។
ក្រុម Real Madrid បានបរាជ័យកាលពីជើងទី១ ក្នុងលទ្ធផល ២-១ រួចមកហើយ។ ដូច្នេះជើងទី២លេងនៅទឹកដីអង់គ្លេស ក៏អាចនឹងធ្វើឱ្យក្រុមលោក Zidane ពិបាកក្នុងការវាយបកយកឈ្នះវិញផងដែរ។ ដោយឡែកសម្រាប់ការយល់ឃើញរបស់ Casemiro វិញ មិនដូច្នេះនោះទេ។ កីឡាករប្រេស៊ីល គិតថាជើងទី២នេះ Real Madrid នឹងធ្វើបានល្អជាងជើងទី១ ព្រោះលេងនៅទឹកដី Man City មែន តែគ្មានអ្នកគាំទ្រមកលើកទឹកចិត្តនោះទេ។
Casemiro បានបន្ថែមបែបនេះថា៖ “គ្មានអ្នកគាំទ្រ ជាការប្រកួតលំបាកទាំងសងខាង។ តែយើងជា Real Madrid យើងដឹងវិធីដើម្បីឡើងទៅជុំបន្ដ។ ពួកគេ នឹងមិនមានអ្នកគាំទ្រមកលើកទឹកចិត្តទេ ហើយវាប្រហែលជារឿងល្អសម្រាប់ក្រុម Real Madrid ”៕ប្រភព Marca
