Miralem Pjanic ដែលស្ថិតក្នុងកិច្ចព្រមព្រៀងដោះដូរជាមួយ Arthur ផ្ទេរមក Barcelona បានប្រកាសតាមរយៈបណ្តាញសង្គមថ្មីៗនេះ អំពីកាលបរិច្ឆេទច្បាស់ការមួយ ដែលខ្លួនចាកចេញពីទ្រនំ Juventus។
Pjanic ទើបឈ្នះពាន Serie A លើកចុងក្រោយជាមួយ Juventus ហើយបញ្ជាក់បែបនេះថា៖ “ពេលគិតអំពីរឿងហ្នឹងធ្វើឲ្យអារម្មណ៍ខ្ញុំញាប់ញ័រអស់ហើយ តែបទពិសោធន៍ខ្ញុំនៅ Serie A ជាមួយ Juventus គឺបានឈានមកដល់ទីបញ្ចប់ហើយ ដោយនេះមិនទាន់ជាពេលដែលនិយាយពាក្យលាទេ ព្រោះខ្ញុំមានបំណងចង់រង់ចាំដល់ថ្ងៃទី ២៣ សីហា”។
បញ្ជាក់ថាថ្ងៃទី ២៣ សីហា គឺជាថ្ងៃបញ្ចប់ការប្រកួតទាំងស្រុងគ្រប់ព្រឹត្តិការណ៍ទាំងអស់ប្រចាំរដូវកាល ២០១៩/២០ ពោលគឺជាថ្ងៃវគ្គផ្តាច់ព្រ័ត្រពាន UCL ដោយមិនទាន់ដឹងថាក្រុមណាដែលនឹងឡើងដល់វគ្គផ្តាច់ព្រ័ត្រនោះឡើយ ខណៈដែល Juventus បានបរាជ័យជើងទី ១ ជាមួយ Lyon ១-០ នៅអុតមើលការប្រកួតនាជើងទី ២ អ៊ីចឹងបើឈ្នះ Pjanic ក៏នៅតែត្រូវបន្តជួយក្រុមដដែល។
វាខុសពីករណីរបស់ Arthur ដែលបានបដិសេធមិនត្រលប់មកចូលរួមជាមួយ Barcelona ទៀតឡើយ ត្បិតបើកុងត្រារបស់គេជាមួយ Juventus ត្រូវដំណើរការចាប់ពីថ្ងៃទី ១ កញ្ញាឯណោះក៏ដោយ៕ ប្រភព៖ BeSoccer