Cristiano Ronaldo ជាកីឡាករដែលរកបានប្រាក់ចំណូលច្រើនដាច់គេមួយក្នុងវិស័យបាល់ទាត់ ហើយសព្វថ្ងៃកំពុងក្តោបក្តាប់ទ្រព្យសម្បត្តិរួមខ្ទង់ ៥០០ លានដុល្លារអាមេរិក។
ត្បិតរស់នៅជាមួយទ្រព្យដ៏ច្រើនសន្ធឹក ដែលអាចទិញអ្វីបានតាមចិត្តក្តី ប៉ុន្តែជាមួយកូនប្រុសរបស់ខ្លួន គឺកីឡាករមានដើមកំណើតនៅប្រទេសព័រទុយហ្គាល់ មិនសូវបើកដៃ និងទម្លាប់ឲ្យកូនចាយវាយធំនោះឡើយ។
ជាពិសេសគឺជាមួយកូនប្រុសច្បង Cristiano Junior ធ្លាប់លេចលឺថាសូម្បីតែទូរសព្ទ iPhone មួយគ្រឿង ដែលខ្លួនត្រឹមដកដង្ហើមចោលជាង ២០ នាទីអាចគ្រប់ចំណូលទិញបាននោះ ក៏ Ronaldo មិនអនុញ្ញាតឲ្យកូនរបស់លោកប្រើនោះដែរ ហេតុផលគឺមិនមែនដោយសាររិះលុយអ្វីនោះទេ តែដោយសារចង់បង្រៀនឲ្យកូនឈ្វេងយល់ពីការខិតខំ និងភាពលំបាកមុនទម្រាំអាចយកបានរបស់អ្វីមួយដែលមនុស្សម្នាក់ៗចង់បាន។
ប្រាប់បទសម្ភាសន៍មួយ កីឡាករវ័យ ៣៥ ឆ្នាំនិយាយ៖ “ការចាប់កំណើតរបស់ Cristiano Junior គឺបានផ្លាស់ប្តូរខ្ញុំច្រើនណាស់ ដោយតាមពិតទៅខ្ញុំធ្លាប់ស្រមៃចង់បានកូនប្រុសតាំងពីអាយុ ២៥ ឆ្នាំមកម្ល៉េះ ហើយខ្ញុំចង់ឲ្យកូនប្រុសខ្ញុំគេដើរតាមគន្លងរបស់ខ្ញុំ ក្លាយជាខ្សែប្រយុទ្ធដែលអាចស៊ុតបញ្ចូលទីជាច្រើនគ្រាប់”។
លោកបន្ថែមថា៖ “ជាទូទៅគឺនឹងឆាប់ឲ្យពួកគេទាញភាពខ្ជិលដាក់ក្នុងខ្លួនខ្លាំងណាស់ ពេលដែលអ្នកមានរបស់ហូបចុកច្រើន កន្លែងស្នាក់នៅស្រួល និងរថយន្តទំនើបៗក្នុងផ្ទះ ហើយមានពេលមួយនោះ Cristiano Jr គេធ្លាប់ទារខ្ញុំទិញទូរសព្ទ iPhone តែខ្ញុំបានបដិសេធ ដោយមិនទិញឲ្យគេទេ ដោយខ្ញុំថាបើចង់តេមកខ្ញុំអីអ៊ីចឹង គេអាចយកទូរសព្ទរបស់លោកយាយគេបាន”។
CR7 ធ្លាប់ជាអតីតក្មេងដែលកើតចេញពីទ្រនំគ្រួសារក្រខ្សត់ ក្នុងប្រទេសព័រទុយហ្គាល់ ហើយគ្រប់វិធីដែលគេប្រដៅណែនាំកូននៅពេលនេះ គឺចង់បង្រៀនឲ្យកូនចេះមានភាពតស៊ូដូចគេកាលនៅពីក្មេងអ៊ីចឹងដែរ។ គេក៏ធ្លាប់នាំកូនប្រុសឲ្យមកមើលកន្លែងរស់នៅពីមុន នៅទីក្រុង Lisbon ហើយ Junior ក៏លាន់មាត់ថា៖ “ប៉ា តើហ្នឹងជាកន្លែងដែលប៉ាធ្លាប់រស់នៅមែនទេ?” គេសឹងតែមិនចងជឿ ព្រោះគេគិតថាគ្រប់យ៉ាងប្រហែលអាចបានមកដោយស្រួល និយាយទៅខ្ញុំចង់បង្រៀនឲ្យកូនប្រុសខ្ញុំយល់ថា ការមានទេពកោសល្យមួយមុខមិនអាចផ្តល់ឲ្យអ្នកគ្រប់យ៉ាងបានទេ ដរាបណាណាអ្នកត្រូវមានការខិតខំនិងធ្វើការងារធ្ងន់ខ្លាំងបំផុត ទើបអាចសម្រេចអ្វីគ្រប់យ៉ាងបាន៕
ប្រភព៖ AS | Times