ស្ដេចប្រដាល់ជើងចាស់ Mike Tyson នឹងត្រលប់មកឡើងសង្វៀនសារជាថ្មី តទល់ Roy Jones Jr. នៅថ្ងៃទី ១២ កញ្ញា ឆ្នាំ ២០២០។ ការប្រកួតនេះនឹងធ្វើឡើងក្នុងមជ្ឈមណ្ឌលកីឡា Dignity Health Sports Park នៅឯរដ្ឋ California សហរដ្ឋអាមេរិក ប៉ុន្តែការអនុញ្ញាតឲ្យមានមនុស្សចូលរួមទស្សនាឬអត់ មិនមានការបញ្ជាក់ច្បាស់លាស់នៅឡើយ។
យ៉ាងណាមិញតាមការចុះផ្សាយច្បាស់ការពីសារព័ត៌មាន The Athletic បានឲ្យដឹងថា ការប៉ះគ្នាចំនួន ៨ ទឹកនេះ នឹងមានផ្សាយផ្ទាល់តាមរយៈបណ្ដាញសង្គម Triller តែតម្រូវឲ្យទិញសំបុត្រទស្សនា ក្នុង ១ នាក់តម្លៃ ៤៩,៩៩ ដុល្លារ។
ការ Pre-Order នឹងចាប់បើកដំណើរការពីថ្ងៃទី ២៦ សីហាតទៅ ដោយតម្លៃ ៥០ ដុល្លារនេះ ក៏បូកបញ្ចូលទាំងការទស្សនានៅជំនួបឡើងសង្វៀនរវាង YouTuber ល្បីឈ្មោះ Jake Paul និងអតីតកីឡាករបាល់បោះ Nate Robinson ផងដែរ។
តម្លៃសំបុត្រទស្សនាតាម Online លើកនេះ មិនរាប់ជាតម្លៃដែលថ្លៃបំផុតនោះទេ ដោយកន្លងទៅកំណត់ត្រាតម្លៃសំបុត្រថ្លៃបំផុតសម្រាប់វិស័យប្រដាល់ តាមប្រព័ន្ធអ៊ីនធឺណិតគឺ ១ នាក់ថ្លៃដល់ ៩៩ ដុល្លារឯណោះ សម្រាប់ជំនួបរវាងអ្នកប្រដាល់មិនដែលចាញ់ Floyd Mayweather និងស្តេចប្រដាល់អាស៊ី Manny Paquiao កាលពីឆ្នាំ ២០១៥។
គួរបញ្ជាក់ថាលើកចុងក្រោយដែល Jones ឡើងសង្វៀនប្រកួត គឺនៅខែកុម្ភៈ ឆ្នាំ ២០១៨ ស្របពេលដែល Tyson ខកខាន ១៥ ឆ្នាំមកហើយ តាំងពីឆ្នាំ ២០០៥ មកម្ល៉េះ៕
ប្រភព៖ SportBible