លោក Xavi នៅថ្ងៃនេះ បានប្រកាសថាបានជាសះស្បើយពីមេរោគ Covid-19 ហើយ ក្រោយពីបង្ហើបថាខ្លួនបានឆ្លងរោគកាលពីចុងសប្ដាហ៍កន្លងទៅ។
វីរបុរសរបស់ក្រុម FC Barcelona បានប្រកាសថាខ្លួនឆ្លងមេរោគ Covid-19 កាលពីថ្ងៃសៅរ៍ សប្ដាហ៍មុននេះ ដែលធ្វើឱ្យលោកមិនអាចដឹកនាំក្រុម Al-Sadd លេងបានឡើយ។ តែក្រោយពីនៅដោយឡែកតែឯងប៉ុន្មានថ្ងៃមកនេះ និងព្យាបាលដោយយកចិត្តទុកដាក់មក ពេលនេះ Xavi បានជាសះស្បើយវិញហើយ និងអាចត្រលប់ទៅដឹកនាំក្រុមវិញបានធម្មតា។
បុរសវ័យ៤០ឆ្នាំខាងលើ បាននិយាយថា៖ “អរគុណគ្រប់គ្នាដែលបានផ្ញើសារមកខ្ញុំប៉ុន្មានថ្ងៃមកនេះ។ ខ្ញុំចង់ចែករំលែកទៅគ្រប់គ្នាថា ពេលនេះខ្ញុំបានជាសះស្បើយវិញហើយ និងអាចត្រលប់ទៅផ្ទះ ជុំគ្រួសារបានជាធម្មតា និងអាចដឹកនាំក្រុម Al Sadd បានវិញផងដែរ”៕ប្រភព Barcablaugranes