Karim Benzema បានចាត់ទុកខ្សែប្រយុទ្ធ Neymar ជាកីឡាករពូកែញាក់ជាងគេបំផុតនៅលើលោកនេះ ដោយគ្មានកីឡាករណាអាចមានជំនាញដូចគេឡើយ។
Benzema ធ្លាប់លេងទល់ Neymar អំឡុងពេលកីឡាករប្រេស៊ីលប្រកបអាជីពនៅ FC Barcelona ។ ដោយធ្លាប់លេងប៉ះគ្នាប៉ុន្មានដងមកនោះ កីឡាករបារាំងអាចមើលឃើញថា គ្មាននរណាម្នាក់អាចមានជំនាញញាក់បាល់ល្អដូច Neymar នោះទេ នាពេលបច្ចុប្បន្ននេះ។
ខ្សែប្រយុទ្ធលេខ៩ របស់ Real Madrid បាននិយាយបែបនេះថា៖ “Neymar ញាក់បាល់ល្អជាងគេនៅលើលោកនេះ គ្មានអ្វីត្រូវនិយាយច្រើនទេ។ ការពិតទៅ ខ្ញុំក៏ធ្លាប់គិតពីពាន Ballon d’Or ដែរ តាំងពីខ្ញុំនៅតូចម្ល៉េះ។ តែវាមិនបានធ្វើឱ្យខ្ញុំវង្វេងឡើយ ខ្ញុំតែងតែព្យាយាមឱ្យបានល្អបំផុត ដើម្បីក្លាយជាខ្សែប្រយុទ្ធល្អម្នាក់។ ខ្ញុំមិនឆ្កួតដើម្បីតែពានរង្វាន់ផ្ទាល់ខ្លួនមួយនេះឡើយ”៕ប្រភព Marca