យុវជនឆ្នើម Eduardo Camanvinga ដែលកន្លងមកលេចលឺថាមានសំណាក់ក្លឹបជាច្រើននៅអឺរ៉ុបចង់បាន មានតាំងពីក្លឹបយក្ស Bayern Munich/Real Madrid ក៏ដូចជា PSG ថ្មីៗនេះត្រូវបានប្រធានក្លឹប Rennes គឺលោក Nicolas Holveck ចេញមកបញ្ជាក់ហើយ ថាគ្រប់យ៉ាងមិនអាចកើតឡើងទៅបាននោះទេ។
លោកបានសង្កត់ធ្ងន់ថាការចរចានាំចេញកីឡាករវ័យ ១៧ ឆ្នាំ នៅទីផ្សារដោះដូររដូវក្តៅ គឺមិនអាចធ្វើទៅបានឡើយ ព្រោះដោយសារក្លឹបធំៗកំពុងជួបប្រទះបញ្ហាផ្នែកហិរញ្ញវត្ថុ។
ប្រាប់ RMC Sport លោក Nicolas និយាយ៖ “ស្មោះត្រង់ទៅជាមួយ Bayern គឺមិនមានការចរចាត្រូវរ៉ូវអ្វីនោះទេ ដោយខ្ញុំគិតថាអ្នកមិនចាំបាច់សង្ឃឹមនៅទីផ្សារដោះដូរខាងមុខនេះឡើយ ដោយក្លឹបកាន់តែធំ ពួកគេកំពុងជួបប្រទះបញ្ហាកាន់តែខ្លាំង អ៊ីចឹងមិនអាចរំពឹងការចុះហត្ថលេខាធំណាមួយកើតឡើងនៅរដូវក្តៅបានឡើយ”។
លោកបន្ថែមទៀតថា៖ “ប្រសិនយើងមានសំណាងបានទៅលេងនៅ Champions League នោះឱកាសនៃការប្រលូកក្នុងទីផ្សារអាចនឹងមានខ្ពស់ តែបើអត់ទេ គឺគ្មានឱកាសដែលកីឡាករចាកចេញឡើយ”។
បញ្ជាក់ថា Camavinga ត្រូវបានប្រធានក្លឹប Rennes ទាមទារតម្លៃខ្លួនរបស់គេ ពីសំណាក់ក្លឹបធំៗដល់ទៅ ៧០ លានអឺរ៉ូឯណោះ តែផ្អែកតាមស្ថានភាពវីរុស COVID-19 កំពុងញាំញីផងនោះ វាអាចថាជារឿងដែលពិបាកនឹងកើតឡើងបំផុត៕
ប្រភព៖ AF