តាមរបាយការណ៍ពីសារព័ត៌មានអេស្ប៉ាញ AS បានចុះផ្សាយ ក្លឹប Real Madrid កំពុងរៀបចំផែនការណ៍ក្នុងការលៃលកយកអ្នកថ្មី មកទុកបម្រុងដៃ Thibaut Courtois ឬក្លាយជាអ្នកចាំទីដៃទីពីរ បន្ទាប់ពីការចាកចេញរបស់ Alphonse Areola។
ការមកដល់របស់ Areola នៅលក្ខខណ្ឌខ្ចីជើងត្រឹមបញ្ចប់រដូវកាលនេះ ហាក់មិនបង្ហាញផ្លែផ្កាអ្វីទាល់តែសោះ ដែលរុញឲ្យរូបគេបានត្រឹមនាំភាពអវិជ្ជមានត្រលប់ទៅទ្រនំចាស់នៅក្លឹប Paris Saint-Germain ក្នុងប្រទេសបារាំងវិញ។
អ្នកបន្ទាប់សម្រាប់ការចង់បានរបស់ Real Madrid ត្រូវបានគេដឹងថា ជាអ្នកចាំទីអ៊ុយក្រែន Andriy Lunin ដែលយុវជនរូបនេះក៏ជាកីឡាកររបស់ Real ដែរ តែបច្ចុប្បន្នជាប់នៅលក្ខខណ្ឌខ្ចីជើងជាមួយក្លឹប Real Oviedo នៅលីគលំដាប់ទីពីរ។
ស្តេចសហាក់មិនមានបំណងលក់កីឡាករវ័យ ២១ ឆ្នាំទៅឲ្យក្លឹប Oviedo អ្វីនោះទេ ពេលគេផុតកុងត្រាខ្ចីជើងនៅអំឡុងចុងខែតុលានេះ ដោយនឹងនាំយកត្រលប់មក Bernabeu វិញ ដើម្បីដើរតួជាអ្នកចាំទីដៃទីពីរផ្ទាល់តែម្តង៕
ប្រភព៖ Sportskeeda