លោក Pele វីរបុរសបាល់ទាត់ប្រេស៊ីល បាននិយាយថា Cristiano Ronaldo ជាអត្តពលិកសម័យទំនើបដែលយុវជនជំនាន់ក្រោយគួរតែយកគំរូតាម។
Ronaldo វ័យ៣៥ឆ្នាំកំពុងលេងឱ្យក្រុម Juventus និងបានជួយក្លឹបអ៊ីតាលីមួយនេះលើកពាន Serie A ២ឆ្នាំជាប់គ្នាផងដែរ តាំងពីរូបគេផ្លាស់មក ស្របពេលក្រុមសេះបង្កង់នេះមានកំណត់ត្រាឈ្នះលីគកំពូល៩ឆ្នាំជាប់គ្នាមកហើយ។ ត្បិតតែវ័យច្រើនមែន ប៉ុន្ដែអតីតកីឡាករ Real Madrid រូបនេះនៅតែដើរតួយ៉ាងសំខាន់ក្នុងការប្រជែងពានរង្វាន់នានា ជាពិសេស Top Scorer តែម្ដង។
មើលឃើញការខិតខំរបស់ Ronaldo នេះហើយ ទើបបានជាលោក Pele វីរបុរសបាល់ទាត់ពិភពលោកអះអាងថា ខ្សែប្រយុទ្ធព័រទុយហ្គាល់ជាកីឡាករសម័យទំនើបម្នាក់ ដែលគ្រប់គ្នាគួរតែយកគំរូតាម។ រូបគេបានបង្ហាញឱ្យគ្រប់គ្នាឃើញថា ជោគជ័យតែងតែបានមកដោយសារតែការខិតខំប្រឹងប្រែងជានិច្ច។ ចូរធ្វើអ្វីដែលខ្លួនចង់ ដើម្បីបំពេញគោលដៅរបស់ខ្លួនឯង៕ប្រភព Goal