• Man Utd ​អាច​យក Maguire ​បាន ​ប៉ុន្តែ​ត្រូវ​ចំណាយ​៦៥​លាន​ផោន

    ក្លឹប Manchester United ​អាច​ទិញ​យក Harry Maguire ​ពី​ក្លឹប Leicester City ​បាន​នៅ​រដូវ​កាល​ដោះដូរ​កីឡាករ​នេះ ប៉ុន្តែ​ត្រូវ​ចំណាយ​តម្លៃ​ខ្លួន​រហូត​ដល់​៦៥​លាន​ផោន​ឯ​ណោះ។

    ខ្សែ​ការពារ​កណ្ដាល​ខាង​លើ​នេះ គឺ​ជា​កីឡាករ​ទី​១​ដែល​លោក Jose Mourinho ​ចង់​បាន​ដើម្បី​មក​ពង្រឹង​តំបន់​ការពារ​កណ្ដាល​របស់​ខ្លួន ដែល​តែងតែ​របូត​គ្រាប់​បាល់​ញឹកញាប់។ យ៉ាងណាមិញ ​ការ​ចង់​បាន​កីឡាករ​បង្ហាញ​សមត្ថភាព​ខ្ពស់​នៅ World Cup ​ជាមួយ​ក្រុម​អង់គ្លេស​ម្នាក់​នេះ មិនមែន​ជា​រឿង​ងាយ​ស្រួល​ឡើយ។ Leicester City ​បាន​ដាក់​តម្លៃ​ខ្លួន​រូបគេ​ដល់​៦៥​លាន​ផោន​ហើយ ប្រសិន​បើ​ក្លឹប​បិសាច​ក្រហម​ចង់​បាន​មែន ​ត្រូវ​តែ​ចំណាយ​ច្រើន​យ៉ាង​នេះ​ទើប​អាច​ផ្ដាច់​កុងត្រា​នាំ​យក​ទៅ​បាន។

    ការ​ចង់​បាន​កីឡាករ​វ័យ​២៥​ឆ្នាំ​នេះ គឺ​តម្រូវ​ឱ្យ​លោក Jose Mourinho ​ត្រូវ​បញ្ចេញ​កីឡាករ​ខ្សែ​ការពារ​កណ្ដាល​របស់​ខ្លួន​ម្នាក់​ចេញ​សិន ទើប​មាន​កន្លែង​សម្រាប់​ Maguire។ មួយ​វិញ​ទៀត ​ការ​ចំណាយ​ច្រើន​នេះ ក៏​ជា​ចំណែក​ដែល​ធ្វើ​ឱ្យ​ក្រុម​បិសាច​ក្រហម​ត្រូវ​បញ្ចេញ​កីឡាករ​ចោល​ខ្លះ​ដែរ ដើម្បី​បាន​លុយ​នាំ​មក​កីឡាករ​ថ្មី​បន្ថែម។

    Maguire ​ជា​ខ្សែ​ការពារ​ដែល Leicester City ​ទិញ​យក​ពី​ក្រុម Hull City ​កាល​ពី​រដូវ​កាល​មុន ​ក្នុង​តម្លៃ​ខ្លួន​១៧​លាន​ផោន។ ​ខ្សែ​ការពារ​រូបនេះ ចាប់​ផ្ដើម​ល្បី​ឈ្មោះ​ក្រោយ​ពី​ជាប់​ឈ្មោះ​ជម្រើស​១១​នាក់​ដំបូង​ឱ្យ​អង់គ្លេស​នៅ World Cup ​ហើយ​ថែម​ទាំង​រក​បាន​១​គ្រាប់​និង Assist ​បាន​១​គ្រាប់​ថែម​ទៀត៕ប្រភព៖ DailyMail

     

    ភ្ជាប់ទំនាក់ទំនងជាមួយ CTS SPORT