Bruno Fernandes ដែលជាចំណែកដ៏សំខាន់ជួយឲ្យ Man Utd មានឱកាសរក្សាតំណែង Top 4 នៅ PL រដូវកាល ២០១៩/២០ ថ្មីៗនេះបានបង្ហាញការបកស្រាយពាក់ព័ន្ធនឹងការខិតខំប្រឹងប្រែងរបស់ក្រុមទាំងមូលនៅប្រកួតចុងក្រោយ ក៏ដូចជាផ្ញើសារគាំទ្រការខិតខំពេញទំហឹងរបស់ Jesse Lingard។
Lingard ជាអ្នករកបានគ្រាប់បាល់ចុងក្រោយ នៅចុងតង់សេសសល់ប៉ុន្មាននាទី ក្រោយអ្នកចាំទីរបស់ Leicester ភ្លាត់ស្នៀតផ្តាច់បាល់មិនបានល្អ។ វាជាគ្រាប់បាល់ដំបូងនៅ PL សម្រាប់ Lingard ខកខានតាំងពីខែធ្នូ ឆ្នាំ ២០១៨ មកម្ល៉េះ។
Bruno បាននិយាយប្រាប់ MUTV ថា៖ “Jesse គេធ្វើបានល្អខ្លាំងណាស់ តាមពិតទៅថាជាកំហុសរបស់អ្នកចាំទី តែប្រសិនណា Jesse មិនទៅដល់ទីនោះ បែបនេះគ្រាប់បាល់ក៏មិនអាចកើតឡើងដូចគ្នា អ៊ីចឹងវាត្រូវតែសក្ដិសមសម្រាប់ការខិតខំរបស់គេ”។
លោកបន្ថែមថា៖ “សម្រាប់ខ្ញុំ Jesse សក្តិសមនឹងការទទួលបានគ្រាប់បាល់មួយនោះ ព្រោះផ្អែកទៅលើអ្វីដែលគេបានខិតខំរៀងរាល់សប្ដាហ៍ ហើយក៏ជាការឆ្លើយតបទៅការបញ្ចេញមតិរបស់អ្នករាល់គ្នាដែលនិយាយអំពីគេ”៕
ប្រភព៖ SportBible