លោក គឹម ភក្ដី ដែលជាគ្រូបណ្ដោះអាសន្នរបស់ក្លិបបឹងកេតបានអះអាងថា លោកចង់បន្តការងារស្នូលជានាយកបច្ចេកទេសរបស់ក្លិបជាង និងជំរុញក្រុមរិះរកគ្រូបង្វឹកណាមានកម្រិតកាន់តែខ្ពស់ជាងលោក។
“និយាយត្រង់ទៅ ខ្ញ៉ំនៅតែចង់ធ្វើជាអ្នកបច្ចេកទេស ចង់ធ្វើការផ្នែកនេះទៀត។ យើងចង់ជំរុញក្លិបរកគ្រូកាន់តែមានកម្រិតខ្ពស់ មានសមត្ថភាពអភិវឌ្ឍកីឡាករវ័យក្មេងយើងឈានទៅកម្រិតអន្តរជាតិ។ នេះជាអ្វីដែលខ្ញ៉ំរំពឹងទុក។”
បុរសកាន់ A-License ទទូចថា ចង់ឃើញបឹងកេតមានគ្រូកម្រិតខ្ពស់ជាងលោកដើម្បីមានលទ្ធភាពអភិវឌ្ឍក្រុម ជាពិសេសយុជនបានប្រសើរជាងនេះ។លោក គឹម ភក្ដី បានចូលរួមជាមួយបឹងកេតក្នុងនាមនាយបច្ចេកទេសកាលដើមឆ្នាំ២០១៩ និងត្រូវបានថ្នាក់ដឹកនាំជ្រើសរើសឲ្យដឹកនាំជាគ្រូបណ្ដោះអាសន្នជំនួសលោក APISIT IM AMPHAI ដែលបានវិលទៅប្រទេសថៃវិញកាលខែមិថុនា២០២០៕
អត្ថបទ៖CNCC