ការប្រកួតជុំចុងក្រោយនៅក្របខ័ណ្ឌកំពូលអង់គ្លេស បានបញ្ចប់ជាស្ថាពរនៅយប់រំលងអាធ្រាត្រចូលថ្ងៃទី ២៧ កក្កដា។ ជាលទ្ធផល Man Utd និង Chelsea បានរំកិលខ្លួនមកឈរកៅអី Top 4 ជាផ្លូវការ ក្រោយយកឈ្នះលើ Leicester City និង Wolves នាប្រកួតជុំទី ៣៨។
បិសាចក្រហមដែលឈរលេខ ៣ មាន ៦៦ ពិន្ទុ ប៉ុន្តែនាំមុខគ្រាប់បាល់ចំណេញលើ Chelsea ដែលឈរលេខ ៤ ហើយ Leicester City មាន ៦២ ពិន្ទុ ឈរនៅចំណាត់ថ្នាក់ទី ៥ និង Tottenham ឈរចំណាត់ថ្នាក់ទី ៦។
លទ្ធផលនេះសម្រេចឲ្យឃើញថា Man Utd និង Chelsea មានឱកាសលេងនៅវគ្គចែកពូលស្វ័យប្រវត្តិសម្រាប់ការប្រកួត UEFA Champions League រដូវកាល ២០២០/២១ ស្របពេលដែល Leicester City ត្រូវធ្លាក់ទៅកាន់កៅអីនៅ UEFA Europa League វិញ។
គួរបញ្ជាក់ថាសម្រាប់ Spurs នៅមានឱកាស រំកិលខ្លួនមកកាន់កៅអីវគ្គចែកពូល UEL ស្វ័យប្រវត្តិ ដោយមិនចាំបាច់ឆ្លងកាត់ការប្រកួតជម្រុះ ប្រសិនណាការប្រកួតនៅ FA Cup វគ្គផ្តាច់ព្រ័ត្រតោខៀវ Chelsea អាចផ្តល់មេរៀនបរាជ័យឲ្យកាំភ្លើងធំ Arsenal បែបនេះកៅអីសម្រាប់ក្រុមឈ្នះ FA Cup ដែលជាន់ឈ្មោះត្រូវ Chelsea លេងនៅ UCL នោះ នឹងផ្ទេរស្វ័យប្រវត្តិមកកាន់ក្រុមលេខ ៦ នៅ PL ដែលជា Spurs តែម្តង៕