វីរបុរសរបស់ក្រុម Barcelona លោក Xavi បានប្រកាសថាខ្លួនមានផ្ទុកមេរោគ Covid-19 ក្រោយពីបានធ្វើតេស្ដប៉ុន្មានថ្ងៃមកនេះ។កាលពីម្សិលមិញនេះ ដំណឹង Xavi ផ្ទុកមេរោគ Covid-19 បានផ្ទុះឡើង ដែលធ្វើឱ្យមានការភ្ញាក់ផ្អើលយ៉ាងខ្លាំង។ ដោយក្លឹប Al Sadd របស់កាតា ជាអ្នកប្រកាសដោយខ្លួនឯងតែម្ដង។ ដោយឡែកសាមីខ្លួនអតីតកីឡាករជម្រើសជាតិអេស្ប៉ាញវិញក៏បាននិយាយដែរថា៖ “ត្បិតតែរកឃើញមានមេរោគមែន ប៉ុន្តែសំណាងល្អសុខភាពរបស់ខ្ញុំល្អប្រសើរ។ ខ្ញុំនឹងនៅដោយឡែកសិន រហូតដល់គ្រូពេទ្យបញ្ជាក់ថាគ្មានរោគ ទើបត្រលប់ទៅធ្វើការវិញ។ អរគុណអ្នកគ្រប់គ្នាដែលបារម្ភ”។
រំលឹកថាបុរសវ័យ៤០ឆ្នាំខាងលើ បានចូលនិវត្តន៍ពីបាល់ទាត់នៅឆ្នាំ២០១៩កន្លងទៅ ដោយលោកបានចាកចេញពី Barcelona មកលេងឱ្យក្រុម Al Sadd នៅឆ្នាំ២០១៥។ ចំណាយពេល៤ឆ្នាំនៅក្លឹបកាតានេះ លោកក៏បានសម្រេចចិត្តចូលនិវត្ត ហើយគ្រានោះក៏ចាប់អាជីពជាអ្នកចាត់ការក្លឹបនេះតែម្ដង៕