Cristiano Ronaldo ក្រៅពីជាប់ឈ្មោះជាកីឡាករល្អបំផុតមួយរូបក្នុងទីលានប្រកួត ក្រឡេកទៅមើលសកម្មភាពក្រៅទីលាន ក៏កីឡាករសញ្ជាតិព័រទុយហ្គាល់បានចូលរួមយ៉ាងសកម្មជាមួយកម្មវិធីសប្បុរសធម៌នានាផងដែរ។
ជាញឹកញយចាប់តាំងពីគេបានផ្ទេរមកចូលរួមនៅក្លឹប Real Madrid ជាមួយតម្លៃបំបែកកំណត់ត្រា CR7 បានចូលរួមជាបន្តបន្ទាប់នៅការងារសប្បុរសធម៌ មិនថាតែការសាងសង់សាលារៀន ឬជួយដល់ជនខ្វះខាត ហើយភាគច្រើនគឺលោកយកថវិកាទទួលបានពីការប្រកាសដាក់លក់ពានរង្វាន់បុគ្គលដែលលោកទទួលបាន។ តទៅនេះ CTS Sports បង្ហាញពេល ៧ លើកដែលខ្សែប្រយុទ្ធវ័យ ៣៥ ឆ្នាំធ្លាប់បានចូលរួមជួយ៖
១) ការបរិច្ចាគដំបូងបង្អស់ គឺកើតឡើងនៅឆ្នាំ ២០១១ ពេលដែល CR7 បានដាក់ឲ្យដេញថ្លៃនូវពានស្បែកជើងមាស European Golden Boot ជាមួយតម្លៃជាង ១,៥ លានដុល្លារ ហើយបានយកលុយនោះទៅសាងសង់សាលាក្នុងទីក្រុង Gaza។
២) នៅឆ្នាំដដែល នាខែធ្នូ អាវរបស់លោកដែលជាប់ហត្ថលេខាផ្ទាល់ខ្លួន ក៏ Ronaldo បានលក់ចេញនៅតម្លៃជិត ៤ មុឺនដុល្លារ ហើយប្រគល់លុយនោះឲ្យទៅក្នុងមូលនិធិជួយដល់កុមាររបស់អង្គការ Save The Children។
៣) នៅឆ្នាំ ២០១៣ ពេលលោកបានឈ្នះប្រាក់រង្វាន់ជាង ១១ មុឺនដុល្លារ ពេលឈរឈ្មោះជាកីឡាករនៅ Team Of The Year របស់ UEFA ហើយក៏បានយកលុយនោះទៅជួយដល់អង្គការកាកបាទក្រហម។
៤) ដល់ឆ្នាំ ២០១៤ Ronaldo បានក្លាយឈ្មោះជាឯកអគ្គរដ្ឋទូតរបស់ Unicef និងអង្គការ World Vision ហើយលោកបានប្រើប្រាស់ថវិកាដែលឈ្នះពី Champions League ចំនួន ៥៧០ ០០០ មុឺនដុល្លារ ទៅចូលរួមជាមួយស្ថាប័នខាងលើ។
៥) ក្រោយមកពេលក្រុមគ្រូពេទ្យលើកោះ Madeira ព្យាបាលជំហឺមហារីកម្តាយរបស់លោកជោគជ័យ CR7 ក៏បានបរិច្ចាគប្រាក់ជាង ១៥ មុឺនដុល្លារផ្សេងទៀតឲ្យទៅមជ្ឈមណ្ឌលសុខភាពនៅទីនោះ ហើយចន្លោះពេលដដែលក៏បានជួយដល់ក្មេងអាយុ ១០ ខែម្នាក់ដែលខ្វះខាតថវិកាក្នុងការវះកាត់ខួរក្បាលប្រមាណជាង ៧ មុឺនដុល្លារ។
៦) ដល់ឆ្នាំ ២០១៦ ពេល Ronaldo ទទួលបានប្រាក់ឧបត្ថម្ភបន្ថែមពីក្លឹប Real Madrid ក្រោយឈ្នះ UCL នូវទឹកប្រាក់ជិត ៦៧ មុឺនដុល្លារ លោកក៏បានបង្វែរលុយទាំងនោះទៅក្នុងការងារសប្បុរសធម៌ដូចគ្នា។
៧) អំឡុងស្ថានភាពជំងឺ COVID-19 ផ្ទុះខ្លាំងកន្លងទៅនេះ Cristiano ក៏បានចូលរួមចំណែកនូវទឹកប្រាក់ប្រមាណ ១,១ លានដុល្លារ ដល់មន្ទីរពេទ្យក្នុងទីក្រុង Lisbon និង Porto នៅប្រទេសព័រទុយហ្គាល់ផងដែរ៕
ប្រភព៖ Goal | CNN