ប្រិយមិត្តអ្នកគាំទ្រវិស័យបាល់ទាត់ភាគច្រើន ប្រាកដជាបានដឹងថាតារាស្រី Shakira គឺជាគូស្នេហ៍របស់កីឡាករបាល់ទាត់ Gerard Pique។ ទំនាក់ទំនងស្នេហារបស់អ្នកទាំងពីរ បានប្រកាសជាសាធារណៈនៅឆ្នាំ ២០១១ ហើយមកទល់បច្ចុប្បន្នមានកូនកូនប្រុស ២ រូបជាចំណងដៃ។
ពីក្រោយទំនាក់ទំនងដ៏ស្អិតល្មួតនេះ អ្នកប្រាកដជាមិនដឹងទេថា ការផ្តើមស្នេហ៍ពីដំបូងៗតើកីឡាករបាល់ទាត់របស់ក្លឹប Barcelona ប្រើវិធីសាស្ត្របែបណាខ្លះ ក្នុងការតាមសុំស្នេហ៍តារាស្រីល្បីឈ្មោះរូបនេះបាន?
Shakira និង Pique បានជួបគ្នាជាលើកដំបូងនៅអំឡុងឆ្នាំ ២០១០ ពេលថតវីដេអូចម្រៀងបទ Waka Waka ដែលជាបទចម្រៀងល្បីខ្លាំងក្នុងកំឡុងព្រឹត្តិការណ៍ FIFA World Cup ឆ្នាំនោះ។ ក្រោយពេលដែលជួបគ្នាហើយ Pique ក៏អូសក្រឡាផ្ញើសារច្រំដែលទៅកាន់ Shakira ដោយសំណួរដែល Pique ចោទសួរជារៀងរាល់ថ្ងៃនោះ “តើអាកាសធាតុថ្ងៃនេះបែបម៉េចដែរ” នេះជាពេលដែលអ្នកទាំងពីរក៏ំពុងស្នាក់នៅក្នុងប្រទេសអាហ្វ្រិកខាងត្បូង។
អស់ពីសំណួរដដែល មានថ្ងៃមួយ Pique បែរជាផ្ញើសារដោយសរសេរពាក្យស៊ីអារម្មណ៍បែបនេះថា៖ “ក្រុមបាល់ទាត់អេស្ប៉ាញរបស់យើង នឹងព្យាយាមតតាំងឲ្យបានឡើងដល់វគ្គផ្តាច់ព្រ័ត្រ ព្រោះដើម្បីចង់ឃើញមុខនាងម្តងទៀត”។ នេះក៏ដោយសារ Shakira ត្រូវឡើងច្រៀងបើកកម្មវិធីលើឆាកប្រគំតន្រ្តីនាវគ្គផ្ដាច់ព្រ័ត្រ។
ការខិតខំរបស់ Pique និងជម្រើសជាតិទាំងមូល ទទួលបានផ្លែផ្កាជាការពិត ដោយបានឡើងមកកាន់វគ្គផ្តាច់ព្រ័ត្រ និងយកឈ្នះហូឡង់ ១-០ លើកពាន FIFA World Cup ដោយជោគជ័យ។
តាំងពីពេលនោះមកទំនាក់ទំនងរបស់ Pique និង Shakira ក៏បានបង្កាត់ក្លាយជាកម្ទេចភ្លើងស្នេហ៍ តែជាលក្ខណៈមិនទាន់បើកចំហ ដោយជារឿយៗគេក៏ប្រមាញ់បានរូបភាពបណ្តើរគ្នារបស់អ្នកទាំងពីរមិនចេះតិចសន្លឹកនោះដែរ។ រហូតដល់ឆ្នាំ ២០១១ នៅលើឆាកប្រគំតន្រ្តីនៅប្រទេសអេស្ប៉ាញ Pique និង Shakira បានបង្ហាញវត្តមានរួមគ្នា ហើយក៏ជាពេលដែលទំនាក់ទំនងស្នេហាបានប្រកាសជាសាធារណៈ។
មកទល់ពេលនេះ អ្នកទាំងពីរមិនទាន់រៀបអាពាហ៍ពិពាហ៍ជាផ្លូវការនៅឡើយ ហើយគម្រោងចង់ធ្វើឡើងពេលណា ក៏មិនទាន់បញ្ជាក់ តែ Shakira ធ្លាប់បាននិយាយហើយថា នាងមិនចង់ឲ្យ Pique ចាត់ទុកនាងជាប្រពន្ធឡើយ ត្រឹមចង់ធ្វើជាសង្សារអស់មួយជីវិត ហើយនាងថាការចាប់ដៃគ្នាជាគូជីវិតច្រើនឆ្នាំមកនេះ ក៏គ្រប់គ្រាន់សម្រាប់ភាពកក់ក្តៅជាលក្ខណៈគ្រួសារមួយហើយដែរ បែបនេះការរៀបការក៏មិនអាចផ្លាស់ប្តូរអ្វីសម្រាប់ជីវិតរបស់នាងឡើយ៕
ប្រភព៖ Sportskeeda | Harpersbazaar