Karim Benzema នារដូវកាល ២០១៩/២០ នៅក្របខ័ណ្ឌ LaLiga លោកបានឈរចំណាត់ថ្នាក់ទី ២ នាមជា Top Scorer បន្ទាប់ពី Lionel Messi ហើយក៏ជាចំណែកដ៏សំខាន់ដែលបានជួយឲ្យ Real Madrid លើកពាន LaLiga ទី ៣៤។
ពីក្រោយភាពជោគជ័យនិងការឈរជើងក្នុងអាជីពបាល់ទាត់ អស់រយៈពេលជាង ១៥ ឆ្នាំ ជឿថាមានអ្នកគាំទ្រតិចណាស់ ដែលធ្លាប់បានដឹងពីប្រវត្តិស៊ីជម្រៅកាលពីកុមារភាពរបស់កីឡាករបារាំង និងការឆ្លងកាត់រឿងលំបាកខ្លះៗមុនក្លាយជាបុគ្គលជោគជ័យមួយរូបទល់ពេលបច្ចុប្បន្ន។
Karim Benzema កើតនៅថ្ងៃទី ១៩ ធ្នូ ឆ្នាំ ១៩៨៧ ក្នុងទីក្រុង Lyon ប្រទេសបារាំង ដោយមានឪពុកឈ្មោះ Hafid Benzema និងម្តាយឈ្មោះ Wahida Djebbara។ លោកជាកូនទី ៦ ក្នុងចំណោមកូនទាំង ៩ រូបនៅបន្ទុកគ្រួសារ។
ម្តាយឪពុករបស់ Benzema មានសញ្ជាតិដើម ជាជនជាតិអាល់ហ្សេរីទេ ហើយគឺជាជនអន្តោប្រវេសន៍ដែលផ្ទេរមករស់នៅក្នុងប្រទេសបារាំង។ កំឡុងពេលមករស់នៅដំបូង គ្រួសាររបស់ Benzema គឺស្នាក់នៅក្នុងសង្កាត់ Bron ទីក្រុង Metropolis រដ្ឋធានី Lyno ភាគខាងកើតនៃប្រទេសបារាំង។
ពេលនោះហើយជាពេលដែល Benzema ឆ្លងកាត់រឿងលំបាក និងកំហុសឆ្គងជាច្រើនកាលនៅពីកុមារភាព ដោយគេមិនសូវត្រូវរ៉ូវជាមួយញាតិមិត្តជិតខាងនោះទេ ហើយបានដើរតាមគន្លងក្រុមជនពាល បង្កនូវអំពើឧក្រិដ្ឋកម្មជាច្រើនលើកច្រើនសារ។ ឪពុករបស់ Benzema ផ្ទាល់នេះឯង ជាអ្នកព្យាយាមលុតដំ និងទាញកូនប្រុសខ្លួនឲ្យចេញពីការបង្ករឿងផ្សេងៗនៅក្នុងស្រុកភូមិ។
លោក Hafid បានយក Benzema ទៅឲ្យរៀនសូត្រនៅឯសាលាកាតូឡិច ប៉ុន្តែគេអាចមិនសម្របនឹងការរៀនសូត្រនៅទីនោះបានឡើយ ព្រោះរមែងទទួលបានការរើសអើងពីក្មេងៗឯទៀត ពេលដឹងថា Benzema មានសញ្ជាតិដើមជាអាល់ហ្សេរី។ លើសពីនេះរូបរាងកាយរបស់គេកាលនោះ ក៏ធាត់ ដែលរុញឲ្យមិត្តរួមថ្នាក់កាន់តែបន្តុះបង្អាប់ រូបគេខ្លាំងឡើង។ ក្រោយមកទើប Benzema ចាប់ផ្តើម ព្យាយាមកែប្រែទម្លាប់នៃការបរិភោគ រហូតបានស្រក់ទម្ងន់ខ្លះ ហើយក្រឡេកទៅមើលការរស់នៅក៏ទទួលបានការចុះសម្រុងជាមួយអ្នកភូមិផងរបងជាមួយជាបណ្តើរៗដែរ។
លុះដល់អាយុ ៨ ឆ្នាំ Benzema បានចាប់ផ្តើមចូលហ្វឹកហាត់បាល់ទាត់ជាមួយក្លឹប Bron Terraillon នៅឯស្រុកកំណើតផ្ទាល់តែម្តង។ ត្បិតបើអាយុរាងក្មេងបន្តិចមែន តែ Benzema បានបង្កើតឲ្យមានការចាប់អារម្មណ៍យ៉ាងឆាប់រហ័សពីសំណាក់ក្លឹប Lyon ក្រោយបានឃើញក្មេងប្រុសតូចរូបនេះ រកបាន ២ គ្រាប់នៅការប្រកួតតទល់ថ្នាលយុវជន Lyon Youth Academy ឈុតអាយុក្រោម ១០ ឆ្នាំ។
មិនរង់ចាំយូរ ថ្នាក់លើរបស់ Lyon ក៏បានទៅបញ្ចុះបញ្ចូលឲ្យក្លឹប Bron Terraillon លក់ Benzema ឲ្យមកក្លឹបរបស់ខ្លួន តែប្រធានក្លឹប Bron គឺលោក Serge Santa Cruz កាលនោះបដិសេធមិនព្រមលក់ឡើយ។ ក្រោយមកទើបក្លឹប Lyon ទៅរត់ការជាមួយឪពុកម្តាយរបស់ Benzema ផ្ទាល់តែម្តង ទម្រាំការចរចានោះឈានដល់កិច្ចព្រមព្រៀងជោគជ័យមួយ។
ដំណាក់កាលដំបូង Benzema ត្រឹមជាក្មេងរើសបាល់ឲ្យរៀមច្បងនៅការប្រកួតឈុតធំរបស់ក្លឹប Lyon តែប៉ុណ្ណោះ ព្រោះពេលនោះគេទើបមានអាយុ ៩ ឆ្នាំ ប៉ុន្តែគេនៅតែពុះពារ ខិតខំទាំងយប់ថ្ងៃ ក៏ដោយសារចិត្តស្រលាញ់បាល់ទាត់ ហើយរហូតដល់ពេលលេងឲ្យឈុត U16 នៃក្លឹប Lyon យុវជនរូបនេះរកបានដល់ ៣២ គ្រាប់ រំកិលឲ្យឈ្មោះរបស់គេចាប់មានភាពល្បីល្បាញតាំងពីពេលនោះមក។
បង្វែរទៅរករឿងលំបាកៗខ្លះរបស់ Benzema គ្រាទៅហ្វឹកហាត់នៅ Lyon ដំបូង នោះគឺការរស់នៅឆ្ងាយពីផ្ទះ ដោយគេមិនធ្លាប់រស់នៅឆ្ងាយពីឪពុកម្តាយសោះឡើយ ហើយគេជាប្រភេទមនុស្សស្ងៀមស្ងាត់ មិនសូវចេះមាត់ក រហូតដល់ ២-៣ ឆ្នាំបន្ទាប់ទើប Benzema អាចសម្របការរស់នៅនៅទ្រនំថ្មីនេះបាន និងក្លាយជាបុគ្គលដែលចេះលេងសើច ហើយមានភាពច្បាស់លាស់ដូច Benzema ដែលឈរជើងនៅ Real Madrid បច្ចុប្បន្ននេះ។
បន្តទៅការចូលរួមនៅឈុតធំដំបូងៗ Benzema ក៏ទទួលបានការសើចចំអកពីកីឡាករក្នុងក្លឹបឯទៀតផងដែរ តែភ្លាមៗនោះគេឆ្លើយទាំងមានទំនុកចិត្តដោយនិយាយថា៖ “មិនបាច់សើចចំអកខ្ញុំទេ ត្រូវចាំណាពីមុនខ្ញុំធ្លាប់ជាក្មេងរើសបាល់ឲ្យអ្នកមែន តែពេលនេះខ្ញុំមកទីនេះដើម្បីប្រកួតប្រជែងនឹងអ្នក ហើយក៏នឹងប្រជែងយកតំណែងរបស់អ្នកផងដែរ”។
ឆន្ទៈនិងការពុះពាររបស់ Benzema បានបង្ហាញចេញជាផ្លែផ្កាយ៉ាងពិតប្រាកដ ដោយនៅ ១៤៨ ប្រកួត គេរកបានដល់ទៅ ៦៦ គ្រាប់និង Assist ២៦ លើក ហើយទទួលបានការចាប់អារម្មណ៍ពីសំណាក់ក្លឹប Real Madrid និងបានវិវត្តខ្លួនទៅកាន់ទ្រនំក្លឹបយក្សអេស្ប៉ាញជាផ្លូវការនៅថ្ងៃទី ៩ កក្កដា ឆ្នាំ ២០០៩ នៅតម្លៃខ្លួន ៣៥ លានអឺរ៉ូ។
បច្ចុប្បន្ន Benzema ត្រូវបានរាប់ចូល ជាវីរបុរសមួយរូបរបស់ក្លឹប Real Madrid ដោយគេបានឈ្នះពានរង្វាន់បុគ្គល និងពានធំតូចជាមួយក្លឹបរាប់ភ្លេច ហើយអ្វីដែលអស្ចារ្យនោះ អ្នកគ្រោងកំណត់ត្រារកបានគ្រាប់បាល់លឿនបំផុតប្រចាំប្រវត្តិសាស្រ្ត El Clasico គឺមិនមែនជា Messi ឬ Ronaldo ផ្ទុយទៅវិញគឺជាកីឡាករមានសញ្ជាតិដើមអាល់ហ្សេរី និងធ្លាប់ត្រូវបានគេមាក់ងាយកាលពីនៅក្មេងម្នាក់នេះហើយ។
នៅឆ្នាំ ២០១១ ត្បិតបើបរាជ័យ ៣-១ ក្រោមថ្វីជើងរបស់ Barcelona ប៉ុន្តែ Benzema បានចារឈ្មោះនាមជាកីឡាកររកបានគ្រាប់បាល់លឿនបំផុតនៅ El Clasico ប្រើពេលត្រឹម ២១ វិនាទី ក្រោយកែបាល់ចេញពីជើង។
បញ្ជាក់ថា នៅ Real Madrid សព្វថ្ងៃនេះ Karim Benzema ទទួលបានប្រាក់ពលកម្មប្រមាណ ៣៥០ ០០០ មុឺនដុល្លារ/សប្តាហ៍ ហើយក្ដោបក្ដាប់ទ្រព្យសម្បត្តិរួមច្រើនជាង ៤០ លានដុល្លារអាមេរិក៕
ប្រភព៖ LifeBogger