នៅអំឡុងផ្ទុះការរាតត្បាត COVID-19 ក្លឹប Real Madrid បានខាតបង់ចំណូលប្រមាណ ២០០ លានអឺរ៉ូ បែបនេះការមកដល់នៃទីផ្សារដោះដូរកីឡាកររដូវក្តៅ អាចនឹងជាពេលសមគួរដែលក្លឹបអេស្ប៉ាញធ្វើការលក់ចេញកីឡាករ ក្នុងគោលដៅសម្រាលបន្ទុកចំណាយខ្លះ។
អ្វីដែលក្លឹបនៅតែចាយធំ ក្នុងវិបត្តិ COVID-19 នោះគឺថ្លៃពលកម្មសម្រាប់កីឡាករ ហើយបច្ចុប្បន្ននៅ Real Madrid ក៏មានកីឡាករគរជើងគ្នាច្រើនទៀត ហើយបើរាប់ទាំងចាស់ថ្មី និងកីឡាករជាប់លក្ខខណ្ឌខ្ចីជើងទៀតនោះ គឺសរុបមាន ៣៧ នាក់។
តាមប្រភពពី Marca បានឲ្យដឹងថា កីឡាករ ៤ រូបដែលមានភាគរយខ្ពស់អាចនឹងត្រូវ Real លក់ចេញមានដូចជា James Rodriguez, Gareth Bale, Mariano Diaz និង Luka Jovic។
សម្រាប់ Bale ជាទំហំចំណាយប្រចាំឆ្នាំខ្ពស់បំផុត ដោយប្រាក់ពលកម្មរបស់គេគឺទទួលបានដល់ទៅ ១៧ លានអឺរ៉ូ ស្របពេលដែល James ក្លឹបត្រូវចាយ ៨ លានអឺរ៉ូ។ ឈ្មោះទាំងបួនដូចបញ្ជាក់ខាងលើ សុទ្ធសឹងជាកីឡាករដែលមិនសូវមានចំណែកជួយក្លឹបនោះទេ ណាមួយមិនស្ថិតក្នុងជម្រើសដំបូងសម្រាប់លោក Zinedine Zidane ផង។
James អាចនឹងត្រូវចាកចេញទៅកាន់ក្លឹប Benfica, Inter, AC Milan ឬ Man Utd ដែលនេះសុទ្ធសឹងជាក្លឹបធ្លាប់ល្ហៀងៗចង់បានកីឡាករកូឡុំប៊ី ស្របពេលដែល Bale ពិតណាស់ដែលមានក្លឹបផ្សេងចង់បាន តែអ្វីដែលជាបញ្ហាគឺពិបាកក្នុងការចរចាលើថ្លៃពលកម្មដ៏ច្រើនលើសលប់នោះតែម្តង៕
ប្រភព៖ Marca