តាមរបាយការណ៍ពី The Times បានចុះផ្សាយ Dean Henderson ដែលបច្ចុប្បន្នកំពុងខ្ចីជើងលេងឲ្យក្លឹប Sheffield United នឹងវិលត្រលប់មកចូលរួមនៅទ្រនំអាណាព្យាបាល Man Utd វិញនៅរដូវកាល ២០២០/២១។
ជាមួយការលេងឲ្យ Sheffield រដូវកាលនេះ កីឡាករវ័យ ២៣ ឆ្នាំ បានសង្រ្គោះបាល់ Clean Sheets ដល់ទៅ ១៣ លើកឯណោះ ដែលរុញឲ្យអ្នកគាំទ្រជាច្រើនជឿថាការនាំយក Henderson មកជំនួស De Gea គឺជារឿងល្អបំផុតសម្រាប់បិសាចក្រហម។
ទន្ទឹមនឹងកុងត្រាសេសសល់រយៈពេល ២ ឆ្នាំ Henderson ត្រូវបានប្រភពខាងលើសង្កត់ធ្ងន់ ថាចង់ឲ្យ United ច្បាស់លាស់លើតំណែងរបស់ខ្លួន ដែលធានាថាអាចក្លាយជាដៃទីមួយជាប់លាប់ជាមួយក្រុមសិន ទើបខ្លួនគិតគូរដល់ដំណើរវែងឆ្ងាយនៅ Old Trafford។
រំឭកថាក្រឡេកទៅមើលស្ថិតិរបស់ De Gea នៅ ៣៦ ប្រកួតសរុប របូតគ្រាប់បាល់ ៣៥ គ្រាប់និង Clean Sheets បាន ១២ លើកប៉ុណ្ណោះ ដោយកំហុសឆ្គងរបស់គេបានកើតឡើងញឹកញាប់នៅប៉ុន្មានប្រកួតចុងក្រោយ ជាពិសេសនៅបរាជ័យទល់ Chelsea សម្រាប់វគ្គ ៤ ក្រុមចុងក្រោយ FA Cup៕
ប្រភព៖ Sportsmole