លោក Ole Gunnar Solskjaer មិនអាចបញ្ជាក់នៅពេលនេះបាននោះទេ ថាអ្នកចាំទី David de Gea នឹងមានវត្តមានលេងនៅយប់នេះ ទល់ West Ham ឬអត់នោះ។
De Gea បានភ្លាត់២គ្រាប់ ដែលធ្វើឱ្យក្រុម Man Utd បរាជ័យក្រោមថ្វីជើងក្រុម Chelsea ក្នុងលទ្ធផល ៣-១ ក្នុងការប្រកួតពានរង្វាន់ FA Cup វគ្គពាក់កណ្ដាលផ្ដាច់ព្រ័ត្រកន្លងទៅនេះ។ ការបង្កកំហុសជាញឹកញាប់នេះ បានធ្វើឱ្យទំនុកចិត្តលើរូបគេពីសំណាក់លោក Ole ក៏ថមថយចុះខ្លាំងផងដែរ។ ជាក់ស្ដែងនៅយប់នេះ អ្នកចាត់ការ Man Utd មិនអាចប្រាកដថាអ្នកចាំទីអេស្ប៉ាញ នឹងអាចបានលេងឬអត់នោះទេ។
ការប្រកួតនៅយប់នេះ គឺពិតជាសំខាន់ណាស់សម្រាប់ក្រុមបិសាចក្រហម ពោលគឺបើពួកគេអាចឈ្នះ West Ham បាន នោះនឹងមានឱកាសឡើងទៅចូលតំបន់ Top4 បានសម្រេចហើយ។ បច្ចុប្បន្ននេះ ពួកគេនៅលេខ៥ក្នុងតារាង មាន៦២ពិន្ទុ តែនៅសល់១ប្រកួតក្នុងដៃ។ ខណៈដែលក្រុម Leicester City មាន៦២ពិន្ទុដែរ តែលើស១ប្រកួត ឈរនៅលេខ៤។ Chelsea នៅលេខ៣ មានតែ៦៣ពិន្ទុប៉ុណ្ណោះ ហើយតោខៀវ ត្រូវប៉ះ Liverpool នៅរាត្រីនេះទៀត៕ប្រភព Dailymail