នៅយប់ថ្ងៃទី ២០ កក្កដា ស្ថាប័នសារព័ត៌មាន France Football បានប្រកាសនូវដំណឹងភ្ញាក់ផ្អើលមួយ ជុំវិញការរំសាយចោលនូវព្រឹត្តិការណ៍ Ballon d’Or ឆ្នាំ ២០២០ ក្រោមហេតុផលដែលបាល់ទាត់ត្រូវបានផ្អាកអំឡុងស្ថានភាពរីករាលដាលនៃជំងឺ COVID-19 រុញឲ្យការវាយតម្លៃលើកីឡាករអាចមិនស្មើភាពគ្នា។
ពាក់ព័ន្ធនឹងរឿងនេះ ក៏ធ្វើឲ្យអ្នកគាំទ្រមានការខកចិត្តជាខ្លាំង ជាពិសេសគឺកីឡាករផ្ទាល់តែម្តង ដែលខ្លះបានខិតខំពេញមួយរដូវកាល ហើយទទួលបានផ្លែផ្កាលើសពីការរំពឹងទុក។ តួយ៉ាងដូចជា Robert Lewandowski និង Karim Benzema។
ជឿថាការយល់ឃើញនេះ ក៏មិនខុសពីអ្នកគាំទ្រវិស័យបាល់ទាត់ទូទៅ ដែលបានមើលឃើញពីលទ្ធផលជោគជ័យជាទីគាប់ចិត្ត ជាពិសេសគឺ Lewandowski តែម្តង។ សម្រាប់ខ្សែប្រយុទ្ធសញ្ជាតិប៉ូឡូញ តាំងពីដំបូងឡើយមានភាគរយខ្ពស់ជឿថា អាចនឹងឈ្នះពាន Ballon d’Or នៅចុងឆ្នាំ នោះក៏ដោយសារតែជ័យជម្នះរបស់ Bayern Munich ជាមួយពាន Bundesliga និង DFB-Pokal ហើយសាមីខ្លួនផ្ទាល់ក៏រកបានគ្រាប់បាល់នាំមុខប្រចាំតំបន់អឺរ៉ុប ធ្វើបានដល់ទៅ ៥១ គ្រាប់ឯណោះគិតត្រឹមថ្ងៃទី ២១ កក្កដា។ សឹង ៩០ ភាគរយហើយដែល Lewandowski អាចនឹងឈ្នះពាន Ballon d’Or ហើយប្រសិន Bayern លើកពាន UCL ថែមទៀត នោះហើយជា ១០ ភាគរយបន្ថែមលើការរំពឹងទុក។
ក្រឡេកទៅមើល Karim Benzema គឺជាចំណែកដ៏សំខាន់ជួយឲ្យ Real Madrid លើកពាន LaLiga រដូវកាល ២០១៩/២០ ក្រោមការប្រកួតប្រជែងនៅចុងរដូវកាលជាមួយនឹង Barcelona។
និយាយពីការរកគ្រាប់បាល់ Benzema ឈរជា Top Scorer លំដាប់ទី ២ នៅ LaLiga ក្រោយរកបាន ២១ គ្រាប់។ ប៉ុន្តែឱកាសដែលអាចរុញឲ្យកីឡាករបារាំងឈ្នះ Ballon d’Or បាននោះ គឺនៅសេសសល់ក្តីសង្ឃឹមពឹងផ្អែកលើការប្រកួតជើងទី ២ របស់ Real Madrid ទល់នឹង Manchester City។
សរុបមកវិញ ការសម្រេចរបស់ស្ថាប័ន France Football ក៏បានប្រកាសរួចរាល់ហើយ បែបនេះក៏គ្មានការប្រកែកផ្លាស់ប្តូរអ្វីនោះដែរ និងមួយផ្សេងទៀតដូចបានបញ្ជាក់ពីខាងលើ នៅក្របខ័ណ្ឌខ្លះក៏មិនមានការប្រកួតពេញលេញដូចរាល់ឆ្នាំថែមទៀត អ៊ីចឹងការវាយតម្លៃទៅលើកីឡាករណាមួយ ក៏ពិបាកដូចគ្នា។
នាយកជាន់ខ្ពស់របស់ France Football បាននិយាយថា៖ “ការសម្រេចចិត្តបែបណានោះ គឺវាមិនធ្វើឲ្យយើងមានភាពរីករាយឡើយ ប៉ុន្តែអ្វីដែលសំខាន់គឺយើងចង់ធានានូវភាពមានទំនួលខុសត្រូវ ក៏ដូចជាបង្ហាញពីភាពគួរឲ្យទុកចិត្ត ដើម្បីឲ្យពានរង្វាន់មួយនេះមានអត្ថន័យល្អឥតខ្ចោះគ្រប់ពេលវេលាទាំងអស់”៕
ប្រភព៖ Eurosport