អតីតខ្សេប្រយុទ្ធបឹងកេត Julius Oiboh បង្ហើបថាគេអាចនឹងចូលរួមជាមួយទ្រនំថ្មីមួយនៅក្របខណ្ឌ Metfone Cambodian League ជើងទីពីរ ខាងមុខ ហើយជាក្រុមស្ថិតក្នុងចំណោមបេក្ខភាពកំពូលទាំង៦ ប៉ុន្តែរូបគេមិនបានប្រាប់លម្អិតថាក្លិបណានោះទេពីព្រោះពេលនេះស្ថិតក្នុងដំណាកាលពិភាក្សាគ្នានៅឡើយ។
“៖ ខ្ញុំមិនទាន់អាចបញ្ជាក់ច្បាស់ថាជាក្រុមណាឲ្យប្រាកដទេឥឡូវនេះ ព្រោះកំពុងចរចាគ្នានៅឡើយ តែនឹងបង្ហាញនៅពេលអ្វីគ្រប់យ៉ាងត្រូវបានសម្រេចឆាប់ៗខាងមុខ ហើយទ្រនំថ្មីនោះគឺជាក្រុមស្ថិតក្នុងចំណោមក្រុមកំពូលទាំង៦។”
“៖ខ្ញុំមិនទាន់មានស្ថានភាពពេញលេញទេ តែប្រាកដណាស់នឹងរួចរាល់នៅមុនជើងទីពីរ។ ខ្ញុំនឹករឭកដល់ការប្រកួតខ្លាំងមែនទែន។ ការហ្វឹកហាត់ខ្លួនឯងមិនគ្រប់គ្រាន់ទេសម្រាប់ខ្ញុំ។”
Julius Oiboh បានចំណាយពេលពីររដូវកាលចុងក្រោយពី២០១៨ដល់២០១៩នៅបឹងកេតក្នុងក្របខណ្ឌ Metfone Cambodian League តែក៏ធ្លាប់លេងពាន Pre-Season ជាមួយក្រុមដដែលនេះនៅចុងឆ្នាំ២០១៦ និងដើម២០១៧ដែរ។ ក្រោយក្រសោបបានស្បែកជើងមាស MCL 2011 នៅណាហ្គាវើលដ៍ កីឡាករវ័យ២៩ឆ្នាំបានចាកចេញពីកម្ពុជា ទៅលេងឲ្យក្លិបជាច្រើននៅប្រទេសថៃ៕
អត្ថបទ៖ CNCC