អ្នកចាត់ការរបស់ក្លឹប Watford និង Monaco ត្រូវបានក្លឹបបណ្តេញចេញពីតំណែងព្រមគ្នានៅថ្ងៃតែមួយកាលពីយប់ម្សិលមិញ ក្រោយមិនអាចពាំនាំផ្លែផ្កាជោគជ័យមកជួយក្រុមនៅរដូវកាល ២០១៩/២០។
នៅ Watford គឺអ្នកចាត់ការលោក Nigel Pearson បានដឹកនាំឲ្យក្រុមឈ្នះ ៨ ស្មើ ១០ ចាញ់ ១៨ រុញឲ្យលំដាប់ពិន្ទុប្រកៀកប្រកិតនឹងតំបន់គ្រោះថ្នាក់ត្រូវកាត់ឈ្មោះចេញពីការប្រកួត PL រដូវកាលក្រោយ។ នៅ ២ ជុំសេសសល់ក្លឹបបានប្រកាសហើយ គឺលើកឲ្យជំនួយការរបស់លោកមកដឹកនាំជំនួសបណ្តោះអាសន្នសិន ហើយនឹងមានការបញ្ជាក់ផ្លូវការពីដំណឹងផ្សេងទៀតនៅពេលក្រោយ។
ក្រឡេកទៅមើល Monaco ដែលរដូវកាល ២០១៩/២០ នៅ Ligue 1 ខ្ទាតដល់លេខ ៩ ក៏បានរុញឲ្យកៅអីអ្នកចាត់ការលោក Robert Moreno ត្រូវបាត់បង់ដូចគ្នា ក្រោយពីបានកាន់តំណែងអស់រយៈពេល ៧ ខែ។ តាមការបញ្ជាក់គឺលោក Niko Kovac អតីតគ្រូចាស់នៅ Bayern Munich បានចូលមកកាន់តំណែងជំនួស៕ ប្រភព៖ BBC