Mesut Ozil បានប្រកាសចូលនិវត្តន៍ពីក្រុមបាល់ទាត់ជម្រើសជាតិអាល្លឺម៉ង់ហើយ បន្ទាប់ពីមានការរិះគន់ច្រើនពេក ចំពោះរូបគេពេលចប់ព្រឹត្តិការណ៍ World Cup 2018 នេះ។
ទន្ទឹមគ្នានឹងការប្រកាសចូលនិវត្តន៍នេះដែរ អតីតកីឡាករ Real Madrid បានប្រាប់មូលហេតុថាមកពីមានការរើសអើងពូជសាសន៍ និងការមិនគោរព ចំពោះខ្លួន ពីសំណាក់មន្ត្រីធំក្នុងសហព័ន្ធបាល់ទាត់អាល្លឺម៉ង់ អ្នកនយោបាយ ដៃគូសហការ និងប្រព័ន្ធផ្សព្វផ្សាយមួយចំនួនរបស់ប្រទេសអាល្លឺម៉ង់ ជាមូលហេតុចម្បងនៅពីក្រោយការសម្រេចចិត្តបែបនេះ។
ខណៈដែលការចាប់ផ្ដើមចោទប្រកាន់ខាងលើកើតឡើងនៅពេលដែលរូបគេបានទៅជួបជាមួយលោក Erdogan ប្រធានាធិបតីទួរគី និងបានថតរួបជាមួយគ្នាថែមទៀត។ ក្រោយពីនោះមក មានប្រជាជនទួរគីជាច្រើនបានលើកបដាចង់ឱ្យខ្សែបម្រើរូបនេះ មកលេងឱ្យជម្រើសជាតិទួរគីវិញ ប្រសិនបើអាល្លឺម៉ង់បោះបង់រូបគេហើយនោះ។
Ozil កើតនិងធំដឹងក្ដីនៅអាល្លឺម៉ង់ តែមានឪពុកម្ដាយជាជនជាតិទួរគី។ ការណ៍ដែលកីឡាករបានជួបថតរូបជាមួយប្រធានាធិបតីទួរគីកាលពីខែឧសភា កន្លងទៅ បង្កឲ្យមានការខឹងសម្បាជាច្រើនពីសំណាក់អ្នកនយោបាយ (ភាគច្រើនអ្នកស្ដាំនិយម) ប្រជាពលរដ្ឋ និងប្រព័ន្ធផ្សព្វផ្សាយអាល្លឺម៉ង់មួយចំនួនដែលមិនចូលចិត្តទួរគី៕ប្រភព៖ DailyMail
