Heung-min Son ជាកីឡាករបាល់ទាត់ដ៏លេចធ្លោមួយរូបប្រចាំក្លឹប Tottenham Hotspurs ក៏ដូចជាអត្តសញ្ញាណនៃកីឡាករល្អបំផុតតំណាងឲ្យតំបន់អាស៊ី។
នៅពីក្រោយភាពជោគជ័យរបស់ Son ក៏ជឿថាមានអ្នកគាំទ្រជាច្រើន មិនសូវបានដឹងពីប្រវត្តិកាលនៅកុមារភាព និងដំណើរដើមទងខ្លះៗរបស់លោកមុនបោះជំហានក្លាយជាកីឡាករកំពូលនាពេលបច្ចុប្បន្ននេះទេ។
អ្នកធ្លាប់ដឹងដែរឬទេ តើ Son ចាប់ចេះលេងបាល់តាំងពីពេលណា ចុះនរណាជាអ្នកត្រួសត្រាយឲ្យលោកមានថ្ងៃនេះ?
Son Heung-min កើតនៅថ្ងៃទី ៨ កក្កដា ឆ្នាំ ១៩៩២ ក្នុងទីក្រុង Chuncheon ខេត្ត Gangwon ប្រទេសកូរ៉េខាងត្បូង។ លោកជាកូនពៅក្នុងចំណោមបងប្អូនបង្កើតទាំងពីររូប ដែលមានម្តាយឈ្មោះ Eun Jakil និងឪពុកឈ្មោះ Son Woong-Jung។
អាចថាជាក្មេងដែលមានដុងស្រលាញ់បាល់តាំងពីនៅតូច ក៏ដូចជាបរិយាកាសនៅជុំវិញអូសទាញ ព្រោះកាលពីនៅតូចក៏មានបងប្អូនប្រុសរបស់គេ និងឪពុកដែលជាអ្នកចូលចិត្តលេងបាល់ផងដែរ។ Son ចាប់ផ្តើមលេងបាល់ទាត់ នៅពេលដែលគេចេះក្រោកឈរដើរតែម្តង ហើយគេមានចំណង់ខុសពីក្មេងឯទៀត ដោយមិនចូលចិត្តការលេងកុំព្យូទ័រហ្គេម ឬលេងរបស់របរកម្សាន្តអ្វី ដែលក្រៅពីបាល់នោះទេ។
ដូចបញ្ជាក់ពីខាងលើ បរិយាកាសជុំវិញខ្លួនដែលអូសទាញ Son ខ្លាំងបំផុតនោះ គឺឪពុករបស់គេ លោក Woong-Jung ដែលធ្លាប់ជាកីឡាករបាល់ទាត់អាជីពមួយរូប តែដោយសារបញ្ហារបួស លោកបានបោះបង់អាជីពតាំងពីនៅអាយុ ២៨ ឆ្នាំ។ ការចាប់ផ្ដើមហ្វឹកហាត់ដំបូងគឺ Son ទទួលបានការហ្វឹកហាត់ដិតដល់ពីឪពុកនិងបងប្រុសបង្កើតរបស់គេ ពោលមិនមែនទៅចូលរួមហ្វឹកហាត់ជាលក្ខណៈអាជីពជាមួយថ្នាលយុវជនណានោះឡើយ ដោយគេនៅជាមួយបាល់មិនក្រោម ៦ ម៉ោងឡើយ ហើយទម្លាប់ជាប្រចាំគឺ Son ត្រូវបានឪពុកបង្គាប់ឲ្យរៀនត្រិះបាល់រយៈពេល ៤ ម៉ោងជារៀងរាល់ថ្ងៃ។
ដល់អាយុ ១៤ ឆ្នាំទើបឪពុករបស់ Son បើកឱកាសឲ្យគេទៅចូលរួមការប្រកួត ហើយទេពកោសល្យរបស់គេក៏បានបង្ហាញទៅកាន់មហាជន និងពន្លកនៃភាពជោគជ័យក៏ចាប់ដុះបន្តិចម្តងៗតាំងពីពេលនោះមក។
ដោយមើលឃើញពីភាពប៉ិនប្រសព្វរបស់កុមារស្បែកសរូបនេះ នៅថ្ងៃមួយទ្រនំថ្នាលយុវជននៃក្រុម Hamburger SV របស់អាល្លឺម៉ង់បានចាប់អារម្មណ៍លើរូបគេ ហើយនាំយកគេមកចូលរួមនៅក្លឹបក្នុងប្រទេសខ្លួននាខែវិច្ឆិកា ឆ្នាំ ២០០៩។ រយៈពេលជាងកន្លះឆ្នាំបន្ទាប់ចំថ្ងៃកំណើត នាខែកក្កដា Son ទទួលបានដំណឹងល្អ ដោយក្លឹបបានផ្តល់កុងត្រាអាជីពមួយ និងបានឈរជើងនៅឈុតធំដល់ឆ្នាំ ២០១៣ មុនវិវត្តខ្លួនទៅចូលរួមនៅក្លឹប Bayer Leverkusen។
ត្រឹមរយៈពេល ២ ឆ្នាំ សមត្ថភាពលេងរបស់ Son បានសុះសាយទៅដល់ក្លឹបក្រៅតំបន់ ដោយធ្លាប់មានតាំងពីក្លឹប Chelsea, Man Utd, Dortmund, Liverpool និង Spurs ជាដើមចង់បានរូបគេ តែទីបំផុតត្រូវ Spurs ចរចាត្រូវរ៉ូវនាំរូបគេមកកាន់ទឹកដីអង់គ្លេសជាមួយតម្លៃផ្ទេរចេញ ៣០ លានអឺរ៉ូ។ ត្បិតបើភាពជោគជ័យជាមួយពានរង្វាន់នានា Son មិនទទួលបានដូចកីឡាករដទៃក្តី ប៉ុន្តែធៀបនឹងកីឡាករក្នុងតំបន់អាស៊ី គឺ Son ជាកីឡាករមានតម្លៃថ្លៃបំផុត និងជាអ្នករកបានគ្រាប់បាល់ច្រើនបំផុតនៅក្របខ័ណ្ឌ Premier League ធ្វើបាន ៥៣ គ្រាប់។
បច្ចុប្បន្ននៅ Tottenham គេអាចទទួលប្រាក់ពលកម្មប្រមាណ ៨,៨ លានដុល្លារ/ឆ្នាំ ឬខ្ទង់ជិត ១៧ មុឺនដុល្លារ/សប្តាហ៍។ ទ្រព្យសម្បត្តិរបស់ខ្សែប្រយុទ្ធស្លាបរូបនេះ បើតាមរបាយការណ៍ចុងក្រោយគឺមានប្រមាណជាង ២០ លានដុល្លារ។
ជ្រៀតចូលរឿងរសើបពាក់ព័ន្ធនឹងជីវិតឯកជនរបស់ Son បន្តិច ដោយនោះគឺទំនាក់ទំនងស្នេហារបស់ Son ដោយគេមិនធ្លាប់ប្រកូកប្រកាសពីស្នេហាផ្លូវការជាមួយនរណាម្នាក់នៅឡើយ ហើយសព្វថ្ងៃទំនងជានៅ Single ថែមទៀត ទោះបីកន្លងមកធ្លាប់មានសង្សារមិនក្រោម ៤ នាក់រួចមកហើយក៏ដោយ៕
ប្រភព៖ LifeBogger