លោក Arteta អ្នកចាត់ការក្រុម Arsenal ចង់ឱ្យថ្នាក់ដឹកនាំបញ្ចេញកញ្ចប់ប្រាក់ឱ្យច្រើនបន្តិចសម្រាប់រដូវកាលដោះដូរកីឡាករខាងមុខ ដើម្បីទិញកីឡាករថ្មីប្រជែងជាមួយក្រុមធំៗបាន។កាលពីយប់មិញនេះ ក្រុម Arsenal បានបង្កភាពភ្ញាក់ផ្អើលក្រោយពីយកឈ្នះលើក្រុម Liverpool បានក្នុងលទ្ធផល ២-១។ តែបើទោះជាអាចឈ្នះក្រុមកំពូលតារាងសម្រាប់សប្ដាហ៍ទី៣៦មែន ប៉ុន្តែសម្រាប់លោក Arteta មើលឃើញថាសមត្ថភាពក្រុម Arsenal និង Liverpool នៅកម្រិតខុសគ្នាឆ្ងាយខ្លាំងណាស់។ ហង្សក្រហមមានកីឡាករពោរពេញដោយសមត្ថភាព ខណៈដែលក្រុមកាំភ្លើងធំវិញនៅមានចំណុចខ្វះខាតច្រើនមែនទែន។
អតីតគ្រូជំនួយនៅក្លឹប Man City ខាងលើបាននិយាយទៀតថា៖ “ឈ្នះក្រុមដូច Liverpool យើងត្រូវការក្ដោបឱកាសដែលមានឱ្យបានល្អបំផុត ការពារខ្លាំងបំផុត និងជួនកាលក៏ត្រូវការសំណាងដែរ។ ហើយថ្ងៃនេះយើងធ្វើវាបានសម្រេច។ គម្លាតកម្រិតកីឡាកររវាងក្រុមទាំងពីរនៅឆ្ងាយពីគ្នាណាស់។ ខ្ញុំសង្ឃឹមថាយើងនឹងទទួលបានប្រាក់សម្រាប់ទិញកីឡាករថ្មី ដើម្បីឱ្យមានភាពប្រកួតប្រជែងជាមួយក្រុមដទៃទៀតបាន”៕
ប្រភព៖ DailyMail