ការប្រកួតប្រជែងពានរង្វាន់ស្បែកជើងមាសនារដូវកាល ២០១៩/២០ ហាក់កំពុងរកឃើញអ្នកឈ្នះជាបណ្តើរៗហើយ ដោយលទ្ធផលគឺអាចមានភាគរយខ្ពស់ធ្លាក់ដល់ដៃ Robert Lewandowski។
ក្រឡេកទៅមើល Cristiano Ronaldo ក្រោយរកបាន ២ គ្រាប់នៅបាល់ប៉េណាល់ទីបន្ថែមទៀតកាលពីពេលកន្លងទៅ គឺរុញឲ្យលោករកបានគ្រាប់បាល់ទី ២៨ ហើយប្រចាំរដូវកាលនេះ។ បើធៀបនឹង Ciro Immobile គឺ CR7 ត្រូវការ ១ គ្រាប់ទៀតប៉ុណ្ណោះដើម្បីតាមស្មើ និងប្រជែងក្លាយជា Top Scorer ប្រចាំលីគ។
តែបើធៀបនឹងការប្រជែងពានស្បែកជើងមាសប្រចាំតំបន់អឺរ៉ុប គឺ Ronaldo ត្រូវការដល់ទៅ ៦ គ្រាប់ទៀតឯណោះ ដើម្បីតាមស្មើ Lewandowski ដែលកំពុងនាំមុខ មាន ៣៤ គ្រាប់។ សម្រាប់ការប្រកួតរបស់ Juventus នៅសល់ ៦ ជុំទៀត បែបនេះតើ Ronaldo អាចសម្រេចបានដែរឬទេ?
បញ្ជាក់ថា CR7 ខកខានឈ្នះពានស្បែកជើងមាសតាំងពីរដូវកាល ២០១៤/១៥ មកម្ល៉េះ ដែលគ្រានោះលោករកបាន ៤៨ គ្រាប់ឲ្យក្លឹប Real Madrid៕
ប្រភព៖ Marca