បន្ទាប់ពីធ្វើការបិទរដូវកាលរាងលឿនជាងគេបន្តិចនៅ Ligue 1 ពេលនេះបាល់ទាត់បារាំងបានចាប់ផ្តើមត្រលប់មកប្រកួតវិញជាបណ្តើរៗហើយ។ នៅជំនួបមិត្តភាពដំបូងបង្អស់ក្នុងស្ថានភាព COVID-19 ក្នុងប្រទេសបារាំង គឺកើតឡើងរវាងក្លឹប Paris Saint-Germain និង Le Havre។
ការប្រកួតនេះបានប្រព្រឹត្តិទៅ ដោយមានការអនុញ្ញាតឲ្យមានអ្នកគាំទ្រចូលទស្សនាផ្ទាល់ក្នុងកីឡដ្ឋាន ដែលកំណត់យកត្រឹម ៥ ០០០ នាក់។ ប៉ុន្តែអ្វីដែលជារឿងព្រួយបារម្ភ គឺគេសង្កេតឃើញអ្នកគាំទ្រហាក់មិនសូវមានការប្រុងប្រយ័ត្នទាល់តែសោះ ពោលគឺភាគច្រើនមិនឃើញប្រើប្រាស់ម៉ាស និងរក្សាគម្លាតពីគ្នានោះទេ។
សកម្មភាពនេះបានធ្វើឲ្យមានការព្រួយបារម្ភ ស្របពេលដែលការរីករាលដាលនៃ COVID-19 នៅតំបន់អឺរ៉ុប ក៏នៅតែមិនទាន់ទៅណាឆ្ងាយ។
បញ្ជាក់ថានៅប្រទេសបារាំង គិតត្រឹមថ្ងៃទី ១៣ កក្កដា ឈរជាប្រទេសទី ១៨ មានករណីឆ្លងកូវីដ១៩ ច្រើនជាងគេបង្អស់ ដោយមានដល់ទៅ ១៧០ ៧៥២ ករណី ហើយមានអ្នកស្លាប់ច្រើនជាង ៣០ ០០០ នាក់៕
ប្រភព៖ BeSoccer