Bruno Fernandes មានទំនុកចិត្តថាខ្សែប្រយុទ្ធ Marcos Rashford នឹងអាចរកគ្រាប់បាល់ឱ្យក្រុមវិញក្នុងពេលឆាប់ៗនេះ បើទោះជាកន្លងមករូបគេខកខានក៏ដោយ។
របួសខ្នងបានធ្វើឱ្យ Rashford អវត្តមានរហូតដល់១៣ប្រកួតឯណោះកាលពីពេលកន្លងទៅ ហើយការបើករដូវកាលវិញនេះ រូបគេក៏បានជាសះស្បើយនិងអាចចូលលេងបានផងដែរ។ តែការត្រលប់មកវិញនេះ សមត្ថភាពបញ្ចប់ទីរបស់គេហាក់ដូចជាមិនដូចមុនឡើយ ដោយ៦ប្រកួតមកនេះ រកបានតែ១គ្រាប់ប៉ុណ្ណោះដែលជាគ្រាប់បាល់ប៉េណាល់ទីថែមទៀត។
តែទោះជាយ៉ាងនេះក្ដី សម្រាប់ Bruno កីឡាករកំពុងលេចធ្លោរបស់បិសាចក្រហម Manchester United នៅតែមានទំនុកចិត្តលើខ្សែប្រយុទ្ធខាងលើដដែល។ កីឡាករសញ្ជាតិព័រទុយហ្គាល់បាននិយាយថា៖ “ដូចដែលអ្នកបានឃើញ Martial និង Greenwood រកគ្រាប់បាល់បានស្អាតៗក្នុងការប្រកួតកន្លងទៅ ហើយ Rashford ក៏ធ្វើបានល្អដូចគ្នា។ រូបគេលេងបានល្អនិងជួយក្រុមបានច្រើន។ យើងមិនអាចមើលតែអ្នករកគ្រាប់បាល់បានម្នាក់នោះទេថាលេងល្អ យើងក៏ត្រូវមើលលើកីឡាករដទៃទៀតដែរ។ ខ្ញុំជឿថានៅពេលខាងមុខ Rashford នឹងរកគ្រាប់បាល់បានច្រើនឱ្យ Man Utd មិនខាន”៕ប្រភព Skysports
