ក្រុម Spurs បានយកឈ្នះលើក្រុមកាំភ្លើងធំ Arsenal ក្នុងលទ្ធផល ២-១ ក្នុងការប្រកួតសប្ដាហ៍ទី៣៥នៃលីគកំពូលអង់គ្លេសនៅយប់មិញនេះ។
ជំនួបក្រុមនៅក្រុងតែមួយនេះ ពិតជាស្វិតស្វាញខ្លាំង ជាពិសេសមុនការប្រកួតក៏មានការបោះសម្ដីដាក់គ្នាច្រើនដែរ រវាងអ្នកគាំទ្រកាំភ្លើងធំ និងលោក Jose Mourinho តែម្ដង។ តែលទ្ធផលក្នុងការប្រកួតចេញមកគឺ Spurs ជាអ្នកយកបាន៣ពិន្ទុ ដោយ២គ្រាប់របស់ពួកគេធ្វើបានដោយ Son នៅនាទី១៩ និងខ្សែការពារ Alderweireld នៅនាទី៨១។ ដោយឡែក១គ្រាប់របស់ Arsenal ធ្វើបានដោយLacazette នាទី១៦។
ក្រោយពីចប់ការប្រកួតនេះទៅ លោក Jose Mourinho អ្នកចាត់ការក្រុម Spurs បាននិយាយថា៖ “រឿងដែលគេនិយាយថាខ្ញុំចង់តែនៅលើ Arsenal គឺជារឿងរបស់អ្នកគាំទ្រប៉ុណ្ណោះ។ ខ្ញុំគួរតែមានមហិច្ឆតាធំជាងនេះ។ ខ្ញុំមិនចង់និយាយពីខ្លួនឯងនោះទេ ខ្ញុំមិនចង់គ្រាន់តែធ្វើឱ្យអ្នកគាំទ្រសប្បាយចិត្ត ដែលមានចំណាត់ថ្នាក់លើ Arsenal ឡើយ”។ រំលឹកថាជ័យជម្នះនៅយប់មិញនេះ បានធ្វើឱ្យ Spurs ឡើងលើ Arsenal ២ពិន្ទុហើយ ដោយ Spurs នៅលេខ៨ មាន៥២ពិន្ទុ និង Arsenal នៅលេខ៩មាន៥០ពិន្ទុ៕ប្រភព Dailymail
