ជាទូទៅភាពនៅលីវរបស់កីឡាករបាល់ទាត់លំដាប់កំពូលៗ គឺមិនងាយនឹងកើតមាននោះទេ ពោលគឺរមែងត្រូវបានបញ្ចប់ ដោយសារការចាញ់សម្រស់តារាម៉ូដែលឬតារាសម្ដែងស្រី ដែលមានរូបរាងស្រស់ស្អាត។
ប៉ុន្តែប្លែកអីតែតារាបាល់ទាត់កំពូល ៥ រូបនេះ បែរជាជ្រើសយកជីវិតនៅខ្លួនទំនេរទៅវិញ ពោលគឺខ្លះធ្លាប់មានមិត្តស្រីហើយតែបែកបាក់ និងខ្លះមិនធ្លាប់លេចលឺដំណឹងថាបានបង្កាត់ភ្លើងស្នេហ៍ជាមួយនារីណាម្នាក់ទាល់តែសោះ។
៥.Diego Costa
ខ្សែប្រយុទ្ធលេងកាចរបស់ក្លឹប Atletico Madrid ធ្លាប់មានសង្សារជាតារាម៉ូដែល ប៉ុន្តែបានបែកបាក់គ្នានៅឆ្នាំ ២០១៦ និងជ្រើសយកជីវិតនៅលីវទល់សព្វថ្ងៃ។
៤.Sadio Mane
កីឡាករសេណេហ្គាល់មិនធ្លាប់ទម្លាយពីជីវិតឯកជនរបស់ខ្លួន ពាក់ព័ន្ធនឹងរឿងរ៉ាវស្នេហាសូម្បីតែម្ដង ពោលគឺលាក់ជិតឆឹង ហើយនៅកម្មវិធីធំតូច គេរមែងត្រឹមឃើញ Mane ទៅចូលរួមតែឯកឯង ឬពេលខ្លះមានគ្នាតែជាសមាជិកសាច់ញាតិនៅឯប្រទេសសេណេហ្គាល់តែប៉ុណ្ណោះ។
៣.Kylian Mbappe
យុវជនវ័យ ២០ ឆ្នាំថ្មីៗនេះធ្លាប់ល្ហៀងៗថាមានទំនាក់ទំនងជាមួយនារីម្នាក់ ប៉ុន្តែសាមីខ្លួនហាក់មិនមានការឆ្លើយតប ដែលរុញឲ្យចចាមអារ៉ាមនោះបានស្ងប់ស្ងាត់ទៅវិញ។
Mbappe ត្រូវបានគេជឿថា មិនទាន់មានទំនាក់ទំនងស្នេហាអ្វីនោះទេ ព្រោះបច្ចុប្បន្នក៏បន្តរស់នៅក្រោមបន្ទុកជាមួយម្ដាយ ហើយទំនងផ្តោតខ្លាំងលើអាជីពបាល់ទាត់ ដែលគេកំពុងទទួលបានផ្លែផ្កាជាមួយក្លឹប Paris Saint-Germain។
២.Romelu Lukaku
Lukaku ពីមុនធ្លាប់មានមិត្តស្រី ដោយកាលពីឆ្នាំ ២០១៤ លោកធ្លាប់ចាយពេលនៅជាមួយគ្នាច្រើនគួរសមដែរ ប៉ុន្តែចាប់តាំងពីឆ្នាំ ២០១៥ កីឡាករបែលហ្សិកត្រូវគេដឹងថា បានផ្លាស់ប្តូរមកជីវិត Single វិញ។ រហូតមកទល់បច្ចុប្បន្នគេមិនទាន់ឃើញ ខ្សែប្រយុទ្ធរូបនេះបណ្តើរនារីណាម្នាក់ជាផ្លូវការនៅឡើយ។
១.N’Golo Kante
និយាយពី Kante គ្រប់គ្នាប្រាកដជាជឿជាក់ច្បាស់ ព្រោះខ្សែបម្រើសញ្ជាតិបារាំងរូបនេះ គឺជាប្រភេទមនុស្សអៀនខ្មាសច្រើន ហើយមិនសូវចេះមាត់កថែមទៀត។ គេហទំព័រតូចៗខ្លះធ្លាប់ចុះផ្សាយថា Kante មានប្រពន្ធ ប៉ុន្តែនិយាយជាលក្ខណៈផ្លូវការគឺកីឡាករវ័យ ២៩ ឆ្នាំ មិនទាន់ជាប់ពាក់ព័ន្ធនឹងទំនាក់ទំនងស្នេហាច្បាស់ការណាមួយនោះទេ៕