និយាយដល់អតីតម្ចាស់អាវលេខ ៧ ចាស់នៅក្លឹបបិសាចក្រហម មុនចូលដល់សម័យកាល Cristiano Ronaldo អ្នកគាំទ្រប្រាកដជាស្គាល់ច្បាស់នូវកីឡាករអង់គ្លេសមួយរូបផ្សេងទៀត នោះគឺ David Beckham។
Beckham អាចរាប់ថាជា Legend មួយរូបនៅ United ដោយលោកបានបង្កើតភាពជោគជ័យរាប់ភ្លេចទាំងពានក្នុងនិងក្រៅលីគ ក្រោមការដឹកនាំនាសម័យកាលគ្រូតា Sir Alex Ferguson។ បច្ចុប្បន្នលោកកំពុងកាន់កាប់ក្លឹប Inter Maimi នៅឯលីគកំពូលក្នុងប្រទេសអាមេរិក និងក្ដោបក្ដាប់ទ្រព្យសម្បត្តិច្រើនជាង ៤៥០ លានដុល្លារ។
តើអ្នកធ្លាប់ដឹងទេ Beckham មានដំណើរជីវិតបែបណាខ្លះ? ក្នុងអត្ថបទនេះ យើងនឹងបង្វែរអារម្មណ៍ប្រិយមិត្តអ្នកគាំទ្រ ទៅតាមដានចំណុចសំខាន់ៗមុនលោកប្រែក្លាយជាកីឡាករបាល់ទាត់ និងស៊ីជម្រៅចូលដល់រឿងរ៉ាវឈឺចាប់មួយក្នុងជីវិតរបស់លោក។
+ជីវប្រវត្តិ
លោកមានឈ្មោះពេញ David Robert Joseph Beckham កើតនៅថ្ងៃទី ២ ឧសភា ឆ្នាំ ១៩៧៥ ក្នុងទីក្រុង London ចក្រភពអង់គ្លេស ដោយមានឪពុកឈ្មោះ David Edward Alan Beckham និងម្តាយឈ្មោះ Sandra Georgina West។ Beckham ជាកូនប្រុសទោលក្នុងគ្រួសារ ដោយមានបងប្អូនបង្កើតសរុប ៣ រូបសុទ្ធតែជាស្រី។ មួយគ្រួសារគឺជាអ្នកគាំទ្រពេញទំហឹងរបស់ក្លឹប Man Utd តាំងពីដំបូង ដែលហេតុផលនេះហើយទើបរុញឲ្យលោកសម្រេចចិត្តជ្រើសយកក្លឹបអង់គ្លេសមួយនេះជាទ្រនំកាន់ឆ្នាំ។
Beckham ជាក្មេងដែលស្រលាញ់បាល់ទាត់តាំងពីនៅតូច ដោយមានពេលមួយកាលនៅរៀន គ្រូបង្រៀនធ្លាប់សួរថា៖ “តើអ្នកចង់ធ្វើអ្វីពេលធំទៅ?” ភ្លាមនោះលោកឆ្លើយ៖ “ខ្ញុំចង់ធ្វើជាកីឡាករបាល់ទាត់ ហើយគឺជាអាជីពតែមួយគត់ដែលខ្ញុំចង់ចាប់យក”។ ដោយមើលឃើញដុងពីកំណើតរបស់កូន ឪពុកម្ដាយរបស់ Beckham បានយកលោកទៅចូលរួមហ្វឹកហាត់នៅថ្នាលយុវជនរបស់ Manchester United តាំងពីអាយុ ៧ ឆ្នាំ ដោយគ្រានោះគឺស្ថិតនៅចម្ងាយជាង ៣២០ គីឡូម៉ែត្រពីផ្ទះរបស់លោក។ និយាយពីកម្រិតជីវភាព សម្រាប់ Beckham អាចថាមិនជាលំបាកដូចកីឡាករមួយចំនួនឯទៀតនោះទេ ដោយគ្រានៅវ័យកុមារ ឪពុកគឺជាជាងជួសជុលផ្នែកផ្ទះបាយ ខណៈម្ដាយគឺជាជាងលេងម៉ូដសក់ ពោលថវិកាដែលទទួលបានអាចសមល្មមឲ្យគ្រួសាររស់នៅស្រួលបាន។
+ការចាប់ផ្តើមក្នុងវិស័យបាល់ទាត់
អមដោយឆន្ទៈនិងការខិតខំប្រឹងប្រែងខ្ពស់ បុរសសញ្ជាតិអង់គ្លេសបានទទួលផ្លែផ្កាជោគជ័យជាបណ្ដើរៗតាំងពីអាយុ ១៣ ឆ្នាំ ពេលលោកឈ្នះក្នុងការប្រកួត Bobby Chalrton Soccers Schools National Skills ហើយក៏ជាពេលដែលធ្វើឲ្យថ្នាក់លើរបស់ក្លឹប Man Utd មើលឃើញពីទេពកោសល្យរបស់លោក និងបានចុះហត្ថលេខានាំយករូបលោកមកចូលរួមនៅពេលមានអាយុ ១៦ ឆ្នាំ។
រហូតដល់ឆ្នាំ ១៩៩២ ពេលមានអាយុ ១៧ ឆ្នាំគឺជាពេលដែល Beckham បានបង្ហាញខ្លួនលើកដំបូងនៅឈុតធំរបស់បិសាចក្រហម ហើយចន្លោះពេលនោះលោកបានក្លាយជាចំណែកជួយឲ្យក្លឹបឈ្នះពានសំខាន់ៗរាប់ភ្លេច និងអ្វីដែលអស្ចារ្យគឺស្ថិតនៅសម័យកាលឆ្នាំ ១៩៩៩ ជាពេលដែល United ធ្លាប់ឈ្នះពាន ៣ ក្នុងមួយរដូវកាលរួមមានពាន Premier League, FA Cup និង UEFA Champions League។
នៅជម្រើសជាតិ Beckham ក៏ធ្លាប់ជួយតោកំណាចអង់គ្លេសឡើងដល់វគ្គជម្រុះ World Cup ឆ្នាំ ២០០២ ក្រោយការស៊ុតបាល់ Free-Kick យកឈ្នះចុងម៉ោងទល់នឹងក្រិច។ នៅឆ្នាំដដែលនោះក៏ជាពេលដែល Beckham ទម្លាក់ចុងប៊ិចចុះហត្ថលេខាលើកុងត្រា ៣ ឆ្នាំ មានតម្លៃ ២២ លានផោនជាមួយបិសាចក្រហមផងដែរ។
ប៉ុន្តែពេលវេលារបស់ Beckham ជាមួយ United បានឈានដល់ពេលបញ្ចប់ លឿនជាងការរំពឹងទុករបស់អ្នករាល់គ្នា ពោលគឺឆ្នាំ ២០០៣ មានការចរចាដ៏ភ្ញាក់ផ្អើលមួយ ដែល Real Madrid សម្រេចនាំយក Beckham មកកាន់ទឹកដីអេស្ប៉ាញ។ ហេតុផលនៃការចាកចេញនោះ មានភាគរយខ្ពស់គេជឿថា ដោយសារភាពមិនចុះសម្រុងនៃគ្រូសិស្ស ជារួមគឺជាមួយអ្នកចាត់ការលោក Sir Alex Ferguson។
ដល់អាយុ ៣២ ឆ្នាំ ជាពេលដែល Beckham បានចាកចេញពីក្លឹបអេស្ប៉ាញ ហើយផ្ទេរទៅលេងនៅក្លឹប LA Galaxy របស់សហរដ្ឋអាមេរិក ហើយប្រើពេលនៅទីនោះអស់ ៣ ឆ្នាំមានតាំងពីការខ្ចីជើងចុះឡើងទៅកាន់ក្លឹប AC Milan និង PSG។ នៅក្នុងទីក្រុងប៉ារីស ប្រទេសបារាំងនោះហើយ ជាក្លឹបចុងក្រោយនៃការព្យួរស្បែកជើងរបស់អតីតម្ចាស់អាវលេខ ៧ នោះគឺនៅពេលលោកមានអាយុ ៣៨ ឆ្នាំ។
+រឿងរ៉ាវជាមួយនឹងឪពុក
បង្វែរទៅរឿងរ៉ាវកម្សត់របស់ Beckham បន្តិច ដោយដូចបានបញ្ជាក់ខាងលើ បើនិយាយពីជីវភាពមិនជាបញ្ហានោះទេ ប៉ុន្តែអ្វីដែលជារឿង Beckham ពិបាកនឹងប្រឈមបំផុត គឺភាពកក់ក្តៅក្នុងគ្រួសារ។ ម្តាយឪពុករបស់ Beckham បានលែងលះគ្នា នៅឆ្នាំ ២០០២ ក្រោយឆ្លងកាត់ជីវិតអាពាហ៍ពិពាហ៍អស់រយៈពេល ៣៣ ឆ្នាំ។ វាជាពេលដែល Beckham និងបងប្អូនស្រី ២ រូបឯទៀត ចាប់ផ្តើមខឹងសម្បានឹងឪពុករបស់ខ្លួនជាខ្លាំង ព្រោះធ្លាប់ជាបុគ្គលដែលបាននិយាយថានឹងមិនចាកចេញពីម្ដាយរបស់លោកឡើយ។
ទំនាក់ទំនងរវាងឪពុកកូនចាប់ផ្តើមមិនចុះសម្រុង ហើយការរស់នៅត្រូវបង្ខំចិត្តឃ្លាតឆ្ងាយពីគ្នាអស់រយៈពេលជាច្រើនឆ្នាំ។ Beckham បានត្រូវរ៉ូវជាមួយឪពុកវិញ នៅដង្ហើមចុងក្រោយពេលដែលលោកឪពុកបានចែកឋាននៅអាយុ ៥៩ ឆ្នាំ ពោលគឺនៅឆ្នាំ ២០០៧ ដោយសារជំងឺគាំងបេះដូង។ គ្រានោះ Beckham ក៏ស្ថិតក្នុងរថយន្តសង្គ្រោះបន្ទាន់ជាមួយនឹងឪពុកនៅវិនាទីចុងក្រោយនៃជីវិតផងដែរ។
នារយៈពេលចុងក្រោយ ការខឹងសម្បាទៅលើឪពុកដែលធ្លាប់ដើរចេញពីគ្រួសារ សម្រាប់ Beckham ក៏លែងមានតទៅទៀត ហើយកាលពីបុណ្យទិវាឪពុក Father’s Day ប្រធានក្លឹប Maimi រូបនេះ ក៏ធ្លាប់បង្ហោះសារមួយថា៖ “រីករាយថ្ងៃទិវាឪពុក ខ្ញុំចង់អរគុណដល់ប៉ាដែលបានផ្តល់គ្រប់យ៉ាងសម្រាប់ខ្ញុំអស់រយៈពេលជាច្រើនឆ្នាំ”៕